A constata cu tin hopi hoben den e trend di vaping sin sa kico ta wordo hinca den e aparatonan aki

Directora di HUNTO, Dalgis Montalvo:

Den entrevista cu director di Stichting HUNTO, señora Dalgis Montalvo, el a enfoca riba e tema di Vaping bao nos  hobennan, na unda Hunto ta haya hopi diferente caso cu ta bin cerca dje.

   Montalvo a bisa cu den  principio esaki a bin, mirando e diferente casonan cu ta yega na Hunto, y cu nan a wak cu nos hubentud mas y mas ta den e trend di vaping, y hopi biaha nan no sa kico ta e substancianan cu ta wordo hinca den e aparatonan aki.

   “Dus, e ta birando un problema basta pisa cerca nos, mayornan cu ta yama preocupa cu nan yiu ta usando e aparatonan aki. Esaki (vaping) a cuminza como un modo pa yuda esnan cu tabata tin problema cu cigaria, pa por yuda nan baha e uso di cigaria, pero el a bira algo enteramente otro”, Montalvo a expresa.

   E tin di haber con visible y accesible esaki ta pa mucha homber. E ta wordo presenta den paki masha bunita, y e holornan ta bira pa e muchanan algo leuk, pero hopi biaha, nan  no sa ki efecto esaki por tin riba nan salud”, segun directora di HUNTO.

   Durante e prome cuater lunanan di 2026 HUNTO a haya 12 caso di menornan di edad, cu pa un of otro motibo, a yega cerca nos. “Sea cu e mucha a inhala esaki y ta den hospital, of e docentenan ta ripara cu tin un gang cu ta usando e aparatonan aki na scolnan, y esakinan solamente a yega cerca nos. Nos sa cu tin un cantidad hopi grandi eyfo, cu ta usando e aparatonan aki, cu no sa ki substancianan tin den dje”, señora Montalvo a declara.

   El a agrega cu pa HUNTO mes tambe ta hopi importante haya mas informacion tocante esaki. “Pesey nos a bin cu dos experto riba e area di adiccion, for di Colombia, pa nos por train nos mes riba e topico, pero tambe pa wak kico nos, aki na Aruba, por implementa, con nos mester por regula esaki.

   “Pues pa nos e siguiente stap ta: 1) Con visible y con accesible e aparatonan aki ta. Den supermercado hopi biaha bo ta drenta cu bo yiu, cu bo sobrino cu ta mucha chikito, y e prome cos cu bo ta mira ta e aparatonan aki. Pues, e visibilidad di esaki, si bo kier cumpr’e.

   Na Colombia, loke a hala nos atencion ta cu bo mester pidi p’e. Pero no cu bo ta haye bo dilanti con visible con bunita nan ta, nan ta propaganda nan. Y tabata tin cierto regulacion den prijs cu nos a mira, cu no ta algo cu facilmente bo por introduci na Aruba tambe”, Dalguis Montalvo, director di Stichting Hunto a señala.