Un stagiaire di 14 aña cu a haci impacto grandi na compania local

Hoben yen energia y creativo

ORANJESTAD (AAN): Recientemente DIARIO a tuma nota con un compania local a dicidi na expresa nan mes, con fenomenal nan a sinti nan mes cu un teenager cu a bin core stage cerca nan, y a sa di sobresali den tur reto y mustra con e por multi-task y tin energia na cantidad.

   E compania VCC International a hasta bisa cu for di prome dia cu e hoben Ethan Rasmijn a presenta pa core su periodo di stage, el a focus mesora riba loke e compania ta haciendo e momento ey, y el a bira un persona hopi util, y a impresiona nan tur cu su sabiduria, energia, y su forma di check tur cos den practica.

   Durante su stage, e compania tabatin 3 evento grandi cu clientenan, y nan a keda sumamente alivia di tin Ethan ta yudando nan.

   Entre otro, door di yuda clientenan den nan mobile app di ‘Payroll Pro HRM’ na Alhambra, y tambe ta e persona experto den audiovisual na Marriott, su contribucion na nan eventonan tabata tremendo.  Ethan a hasta code y crea un app di registro di evento, cu nan a hasta haci uzo di dje.

   Ademas di e tareanan cu e tin di ehecuta como stagiaire, manera prepara workstations y mas trabao cu ta encera hardware, nan a pidi Ethan pa e ta sigur cu lo bay yena e Ballroom di Marriott pa nan evento nobo, esta e lanzamento di Payroll Pro HRM A.I. chatbots.  Aki ta unda cu Ethen mes a dicidi na yama, manda email, y el a logra!  Ballroom a yena completamente.

   VCC International a indica cu tabata un placer y privilegio pa a traha cu Ethan, y mira con un hoben di apenas 14 aña di edad, a demostra asina gran profesionalismo, etica di trabao, y su mentalidad di “ban-haci-e-trabao”.

   Nan ta sigur, cu unda cu e por bay traha den futuro, nan ta sigur cu e lo bay ta un empleado balioso pa e lugar danki na su actitud y energia, y companianan lo ta encanta pa tin’e den nan team.  Nan ta manda bisa Ethan masha danki, hopi exito, y hopi amor.  Nan a hasta bise, cu si e caba scol, nan tin un lugar p’e na VCC International.