Hopi reaccion den pueblo relaciona cu accident fatal

Atrobe ta lanta bos contra vehiculonan ATV

• Ta cuanto mas lo keda soporta e ‘free-for-all’
• Potret di e accident a laga hopi hende spanta 

ORANJESTAD (AAN): E accident fatal cu a socede Diabierna siman pasa na Boca Indjeco (conoci ultimo tempo como ‘Blackstone Beach’) na costa nort di e isla, unda un dama turista di 39 aña di nacionalidad Mericano a fayece, e trece hopi reaccion den fin di siman.

   Specialmente como cu ta conoci cu e victima fatal a viaha hunto cu varios amiga pa nan bin celebra Dia di Mama na Aruba.

   E reaccion ta trece un biaha mas den spotlight, e ola di protesta den pasado pa prohibi e tipo di vehiculonan ATV y tambe UTV di core riba e isla.  Expertonan ta bisa cu e vehiculonan aki ta daña naturaleza, ta destrui neishi di e Shoco di Aruba, y ta peligroso, ta causa daño na medio ambiente, ta produci hopi stof, sonido, y ta impactando e calidad di bida den areanan afecta.

    Kehonan ta elabora riba e forma  di ‘free-for-all’ cu ta maneha nan, cu ta un forma agresivo, y den grupo largo.  Expertonan ta preocupa cu tur vehiculo tipo ATV y tambe UTV tin un ‘high center of gravity’, y e ta un diseño special pa e vehiculonan aki por pasa riba obhetonan halto riba tera, pa nan por nabega riba tereno bruto, piedra, y lodo.  Sinembargo cu un ‘high center of gravity’, e ta trece hopi riesgo, incluyendo instabilidad y riesgo grandi pa nan bolter.  Pesey hopi cu ta core ATV sa di experiencia cu nan ta basta instabil, y ta djis un movimento demasiado bruto na bo stuurwiel, por pone nan kenter of bolter.

   Otronan ta indica cu e ruta pa bo yega Boca Indjeco (‘Blackstone Beach’) ta asina stijl y peligroso, cu ta asombroso cu el a wordo inclui den excursion den Tours di ATV.

   Hopi ta spera cu Gobierno AVP-Futuro lo por tuma un decision riba e caso aki, pasobra si mas di e casonan aki keda ripiti, e isla por wordo perhudica den su reputacion.

   Y manera por mira riba e potret aki, ta djis falta un tiki mas pa e vehiculo ATV aki (quadracer) lo a cay den lama bruto.  E potret ta pa cortesia di Cuerpo Policial di Aruba.