Parlamentario Shailiny Tromp-Lee:
- E ta un obligacion legal y moral
- Ningun claridad ainda riba e biahe di jet
ORANJESTAD (AAN): Parlamentario Shailiny Tromp-Lee ta recorda pueblo cu, despues di varios luna, ainda Parlamento di Aruba ta en espera di claridad y transparencia total di parti di Minister Gerlien Croes tocante e uzo di un jet priva pa un biahe oficial pa Corsou. Tromp-Lee ta enfatisa cu den un estado di derecho, integridad no ta wordo proba cu palabra, sino cu documento y facturanan cu ta carga e berdad.
Cuater luna di silencio y versionnan contradictorio: Desde november 2025, ora e incidente a tuma luga, e mandatario a duna versionnan cu no ta cuadra cu otro. Prome a wordo bisa cu e mes a paga, despues cu e tabata un “lift” y finalmente cu e gastonan a wordo comparti.
“Aruba no por tin un gobernacion basa riba confusion. Ora un mandatario cambia su storia tres biaha, e unico forma pa recupera confiansa ta door di presenta e prueba di pago real. Te cu awe, e Minister a scoge pa keda den silencio of sconde tras di argumentonan fofo pa no duna e informacion cu Parlamento a pidi formalmente,” Tromp-Lee a declara.
Costo di Bida vs. Luho Innecesario: E falta di transparencia aki ta bira mas grave ora mira e realidad di nos isla. E costo di bida na Aruba ta subiendo dia pa dia, y famianan mester conta tur cen pa cubri nan gastonan basico.
Den e contexto aki, e uzo di un jet priva pa un buelo di apenas 20 minuut ta un acto cu ta falta solidaridad cu e pueblo. Segun e Parlamentario, un lider mester duna e ehempel di austeridad y uzo responsabel di tur recurso, sea publico of personal, ora ta trata di asuntonan di estado.
Palabra so no ta basta, pueblo kier mira prueba: Tromp-Lee ta reitera cu e obligacion di un minister ta pa rindi cuenta. E nengamento di contesta preguntanan di Parlamento y e blokeo di peticionnan pa informacion ta crea un ambiente di duda cu no ta sano pa nos democracia.
“Nos no ta pidiendo opinion di e Minister, nos ta exigiendo e documentonan: e factura di e compania di aviacion y e prueba bancario cu e pago a sali efectivamente for di su cuenta personal. Transparencia real ta nifica stop di papia y cuminsa mustra e papelnan. Pueblo tin derecho di sa e berdad completo riba e biahe aki y si a cumpli cu tur regla di integridad,” e Parlamentario a enfatisa.
Parlamentario Shailiny Tromp-Lee a conclui bisando: “Transparencia no ta un fabor cu un Minister ta haci Parlamento, e ta un obligacion legal y moral. Si e Minister no tin nada di sconde, e mester presenta e pruebanan awe mes. Palabra so no ta basta mas; pueblo kier mira e recibo.”
