Evento ‘Reality Check’ a reuni mas cu 200 persona y tabata completamente sold-out

Exitoso actividad di Comerciantenan Uni of Aruba

ORANJESTAD (AAN): Comerciantenan Uni of Aruba (CUA) a celebra cu hopi exito su evento anual di networking cu e titulo “Reality Check: Aruba’s Growth & Housing Market” na Marriott Ballroom. E evento a resulta completamente sold-out y a reuni mas cu 200 invitado, incluyendo lidernan di gobierno, sector financiero, social, y priva cu empresarionan local pa un anochi di dialogo importante tocante futuro di Aruba.

   E anochi a wordo presenta pa Erin Croes como anfitrion y moderadora oficial di e evento.

   Durante e evento, e audiencia a haya e oportunidad pa scucha ‘keynote presentations’ y participa den conversacionnan profundo tocante crecimiento economico, vivienda, inversion stranhero, financiamiento y e impacto di Airbnb y turismo riba comunidadnan local.

   Alex Cybul, un di e operatornan di Airbnb mas grandi na Aruba, a fungi como keynote speaker y panelista. Durante su presentacion, el a conta con el a cuminsa su trayecto empresarial y con su negoshi di Short-Term Rentals a logra crece na Aruba. Alex tambe a comparti su vision tocante crecimento economico, oportunidadnan den mercado y e impacto di Airbnb riba economia local.

   Minister René “Baba” Herdé, minister encarga cu infrastructura, medio ambiente y desaroyo, tambe a fungi como keynote speaker y panelista, y comparti informacion tocante desaroyo di Aruba, vivienda, infrastructura y e reto di mantene Aruba accesibel pa localnan mientras cu e pais ta sigui creciendo.

   E panel di e anochi tambe a conta cu Piere Rafini (President di Aruba Bankers Association), y Julie Wever (directora di FCCA).

   “Reality Check” a crea un plataforma pa conversacionnan honesto, constructivo y relevante tocante e retonan y oportunidadnan cu Aruba ta enfrentando actualmente.

   Comerciantenan Uni of Aruba (CUA) ta un organizacion dedica na conecta, representa y fortalece comunidad empresarial di Aruba. Actualmente, CUA ta conta cu 200 miembro, tur empresario y doño di negoshi activo den diferente sector di Aruba.