Cuatro aña di prizon pa homber cu a chantahia dos dama y viola un dama

Hues ta haya cu mester manda señal cu no ta tolera esaki

ORANJESTAD (AAN): Diabierna mainta e homber D.E. di 29 aña a scucha Hues bisa cu e ta culpabel di a hack y chantahia dos dama T. y B. y tambe di a viola e dama S. Hues a condena D.E. na 4 aña di prizon di cual 6 luna ta condicional cu un tempo di prueba di 5 aña. Tambe cu D.E. lo mester sigui tratamento obligatorio di Respaldo pa su problema mental y bou guia di Reclassering.

   Den sala di Corte por a mira cu e damanan B. y T. tabata presente mientras cu via video conference e dama S. na Hulanda tabata scucha e decision di Hues.

   Homber ta culpabel: Hues den su evaluacion ta bisa cu e ta haya legalmente proba cu D.E. a hack cellular y chantahia e dama B. Hues a bisa cu no tin prueba cu D.E. a hack e cellular di T. pero si cu D.E. a chantahia T. Pa loke ta violacion di e dama S., Hues a bisa cu abogado mr. Illes a bisa cu mester declara D.E. liber. Hues ta haya cu D.E. a viola S. Hues ta haya e declaracionnan di S. confiabel y consistente. Hues ta haya cu S. a duna suficiente detayes kico a sosode y cu tin prueba di sosten. Hues a mustra cu tin yamada telefonico y ta menciona D. Hues a bisa cu segun D.E. e yamadanan ta fabrica pa asina presiona D.E. pa no papia cu S. lo tabata forma parti di grupo cu ta hack. Hues a bisa cu e no ta kere esaki.

   Castigo: Hues a bisa cu Fiscal a exigi 5 aña di prizon y esaki ta comprendibel mirando e seriedad di e caso. El a bisa cu pa añanan largo D.E. a presiona y chantahia e damanan pa e haya mas potretnan sunu di nan of e lo publica e potretnan cu e tin di nan. Hues a sigui bisa cu D.E. no a keda te esaki. El a viola e dama S.

   Hues a bisa cu tres dama hoben E.D. a perhudica cu e practica aki. Hues ta haya cu mester manda un señal bon cla cu no ta tolera hacking y chantahia hende.

   Problema mental di acusado:  Hues a bisa cu e ta tene cuenta cu e situacion di D.E. caminda psychiater y psycologo ta mustra cu D.E. tin problema mental y ta menos responsabel pa su actonan.

   Psychiater y psycologo ta mustra cu D.E. mester haya tratamento pero no interna den un institucion. Hues a bisa cu den Corte psychiater y psycologo a bisa cu D.E. mester 2 pa 3 aña di tratamento ambulante.

   Hues ta haya cu mester evita cu D.E. ta crea mas victima. Mirando tur esaki, Hues ta haya importante cu D.E. mester haya tratamento debido.

  Nuebe aña bao vigilancia: Hues no a sigui exigencia di Fiscal di 5 aña di prizon, aunke e ta haya esaki comprendibel. Hues a impone un castigo cu en total ta nifica cu durante 9 aña, D.E. ta keda bou vigilancia di Ministerio Publico.

   Hues a condena D.E. na 48 luna di prizon (4 aña), di cual 6 luna ta condicional cu un tempo di prueba di 5 aña. Hues ta obliga D.E. pa tuma tratamento. Hues a bisa cu di e forma aki, ta crea un periodo di 9 aña cu D.E. ta keda bou vigilancia di Ministerio Publico.

   Mester paga daño: Hues a bisa cu e ta aproba mas di 2 mil Euro di daño pa e dama S. na Hulanda. Hues a declara no admisibel e otro demandanan di S. pasobra Hues ta haya cu nan no ta suficiente splica. Pa loke ta daño inmaterial, Hues a aproba 15 mil Florin y si D.E. no paga e lo mester bay 60 dia cera. Tambe mester paga gastonan di abogado calcula na 1000 Florin.

   Hues a bisa cu pa e dama T., gran parti di e demanda lo wordo aproba cu ta den careda di 17 mil Florin. Aki tambe si D.E. no paga e lo mester bay 60 dia sera.

  Hues a prohibi D.E. pa comunica den cualkier forma cu e victimanan T., B. y S.