Hopi remedi ilegal pa baha peso ta riba mercado y ta trece peligronan cu ne

Inspector di Departamento di Remedi ta alerta:

• Nan ta den forma di injectie y mesun angua ta wordo uza cu mas persona 

ORANJESTAD (AAN) Drs. Roselynn Angela, Inspector di Departamento di Remedi, den entrevista cu Matutino DIARIO, a duna di conoce cu tin hopi  producto legal y ilegal riba mercado.

   Hopi di e productonan aki cu ta ilegal, den forma di injectie cu ta pa baha peso, y ta wordo inyecta door di personanan cu no ta capacita pa haci’e.

   “E mesun personanan ey nos a constata cu nan ta inyecta cu anguanan cu nan ta uza un pa mas persona. Anto esey ta hopi peligroso pasobra bo ta usando un remedi caba cu tin su peligernan cu ne, manera cu e calidad di e producto no ta bon, of e remedi no ta esun corecto pa bo, cu por tin hopi interaccion cu esunnan cu bo ta tuma, of cu abo mes tin contraindicacion cu ne, cu e remedi ey no ta pa bo uza, cu por desaroya un alergia cu ta algo toch grave.

   Pero aworaki tambe nos ta wak riba mercado cu e personanan ta uza e mesun angua pa mas cliente. Esey mes por trece hopi riesgo, manera malesa contagioso, y un di nan por ta Aids” señora Rosalynn Angela a señala. El a agrega cu e informacion aki nan ta constata e aña aki. El a alerta cu e situacion ta hopi preocupante. E productonan aki, mayoria ta drenta di Colombia y Santo Domingo pero aworaki por wak riba mercado cu tambe nan ta treciendo nan for di Merca.

   “E parti aki nos no tabata tin hopi control riba dje. A base di e investigacion cu nos ta haci, nos ta bay analice y nos ta bay amplia cu Douane pa controla productonan ilegal”, Inspector di Departamento di Remedi a remarca.

   El a menciona cu e productonan ilegal aki cu ta bin for di Colombia e cantidad ta bahando, pero esnan cu ta bin di Merca ta productonan cu ta den test ainda, den e paki ta bisa “pa reseach only” kiermen ta remedinan cu nan no a wordo ni aproba door di instancianan competente na e paisnan pero nan ta bendiendo nan riba mercado y via online. “Esaki ta un acto ilegal pasobra e producto ey ta bezig pa haya patent. Kiermen nan ta den onderzoek pa subi mercado”, Inspector señora Angela a reitera.