Lo tin boet pa empresanan cu no a ahusta informacionnan corecto di salario minimo den sistema di SVb

Segun Director di SVb, Edwin Jacobs:

ORANJESTAD (AAN): Sociale Verzekeringsbank SVb Aruba lo haci estudionan necesario pa update informacionnan den nan sistema. Director di SVb, Edwin Jacobs a remarca cu ainda tin companianan cu no a ahusta salarionan minimo y rond di salario minimo.

   Meta di esaki ta pa SVb haya informacionnan cu loke e companianan a pone den sistema di SVb ta corecto. El a remarca cu lo tin boet pa e empresanan di cua informacionnan no ta corecto den e sistema. El a remarca cu segun ley, na tur momento  tur informacion na SVb mester ta corecto. 

   Señor Jacobs a duna di conoce cu ya SVb a manda carta na tur empresa pidiendo nan pa manda tur informacion corecto, entre otro payslip, den caso cu nan no a ahusta aumento di salario minimo y rond di salario minimo. Ta importante pa tur doño di trabao, cu tin trahadonan cu nan salario a aumenta, pa adapta esaki den sistema di SVb pa asina nan paga e prima corespondiente.

   El a agrega cu tur trahado cu kier sa si su salario cu e ta ricibi ta e salario sigura na SVb, por bay riba su app di SVb pa confirma esaki y e lo mester ta cerca di loke e ta ricibi riba su payslip. Si e trahado sinti cu e informacion ta incorecto, e por contacta SVb pa nan investiga pa soluciona esaki.