A mira awor con presion poni cerca Gobernador a yuda

Fraccion di MEP ta indica:

ORANJESTAD (AAN): E situacion mundial actual ta sigui crea hopi incertidumbre, y esaki ta tin un impacto directo riba nos comunidad na Aruba. E subida continuo den costo di bida ta pone presion riba cada cas, cada familia, y cada empresa.

   Despues cu e conflicto na Iran a cuminsa dia 3 di maart, Fraccion di MEP a actua cu rapidez y responsabilidad, mandando un carta extenso y bon argumenta pa pidi un reunion urgente cu e minister di economia. E meta tabata cla: busca claridad, orientacion y mas importante ainda, accion concreto pa proteha nos pueblo contra e impacto di e guera.

   Lamentablemente nos a constata cu e minister no a mustra e urgencia cu e situacion ta exigi. Mientras cu e preocupacion den comunidad a sigui crece, e minister tabata ocupa cu otro actividadnan, incluyendo biahe, sin atende cu e gravedad di e tema aki. Den e conferencia di prensa recientemente nan a toca solamente un aspecto limita, e prijs di gasolin, lagando hopi otro preocupacionnan sin contesta. Esaki a laga henter comunidad cu mas pregunta cu contesta, un situacion cu no ta acceptabel den momento di crisis.

   Pa e motibo ey, Fraccion di MEP a tuma e siguiente paso responsabel di dirigi un peticion na gobernador, pidiendo su intervencion pa asegura cu e dialogo democratico den Parlamento wordo restableci. Nos ta kere firmemente den e rol di control di Parlamento y den e necesidad pa tene un discusion habri, serio y enfoca riba solucion.

   MEP ta satisfecho cu e presion cu nan a pone, a resulta efectivo. Dia 15 april pa 9’or di mainta, finalmente lo tin un reunion den Parlamento dedica na e tema aki. Esaki ta un paso importante den e direccion correcto, pero no ta suficiente pa reuni so. Pueblo di Aruba ta spera y merece solucionnan concreto, sostenibel y cu por wordo implementa rapidamente.

   MEP ta invita tur ciudadano pa lesa e peticion, pa keda informa y pa sigui e reunion. Transparencia y participacion ta clave den momento manera esaki. Fraccion di MEP lo sigui insisti riba responsabilidad, liderazgo y accion real.

   Ban spera cu e minister finalmente lo presenta medidanan eficaz pa alivia e presion riba nos pueblo, pasobra Aruba no por sigui cu promesanan bashi. Nos merece mihor.