Fraccion di MEP ta bay contra articulo 9 y 23 di e ley cu nan mes a traha

Segun Presidente di Parlamento, Marlon Sneek:

ORANJESTAD (AAN): Presidente di Parlamento, Marlon Sneek, ta lamenta cu Fraccion di MEP keto bay ta CC carta pa Gobernador Alfonso Boekhoudt cada rato. Den e caso aki, e ta referi na un carta cu Fraccion di MEP a manda mas di un biaha pa su persona, pa pidi un verslag di e screening di Minister Plenipotenciario na Hulanda señora Milly Schwengel.

   Segun Presidente di Parlamento Sneek, Fraccion di MEP ta cuestiona di con Parlamento ainda no a haya e verslag aki, refiriendo na articulo 9 di e Landsverordering Integriteit (kandidaat-) ministers.

   Den e caso aki, e presidente di Parlamento a remarca cu Fraccion di MEP si a haya un contesta di Gobernador riba nan carta specifico aki na unda cu Gobernador a indica cu basa riba e Landsverordening integriteit ministers, no tin ningun obligacion pa manda Parlamento un informe di screening di Minister Plenipotenciario.

   Gobernador a señala tambe cu si haci esaki, incluso por bay contra ley basa riba e mesun articulo 9 di e ley di screening di e Landsverordening integriteit ministers. Cu esaki, segun Sneek, Fraccion di MEP ta pidi Gobernador pa haci algo contra ley.

   Den su carta na Fraccion di MEP, Gobernador ta indica cu articulo 9 ta stipula cu e resultadonan di investigacion, e contenidonan di conbersacionnan y corespondencia entre formador y candidato ta confidencial y solamente por haci mencion di esakinan na Gobernador.

   Ademas, Gobernador a sigui splica, cu segun articulo 23 di e Landsverordening, no por divulga e conbersacionnan aki, of parti di esaki of di e screening na Parlamento. Esaki ta un violacion contra e articulo aki.

   “Atrobe Fraccion di MEP ta purba di bruha tera, manda carta pa loco y ata nan a haya nan contesta di loke nan ta manda puntra ta bay contra nan mesun ley cu nan a traha cu ta indica si manda e informacionnan aki pa Parlamento, ta bay contra articulo 9 y 23. MEP ta bon pa crea desordo enbes di haci nan trabao”, Presidente di Parlamento Marlon Sneek a bisa na final di un entrevista recien cu DIARIO.