A tuma medida pa proteha poder di compra na Aruba

Gobierno ta monitorea situacion mundial:

• A stop tur proyecto no-urgente pa libera recurso 

ORANJESTAD (AAN): Durante rueda di prensa, Prome Minister Mike Eman, hunto cu Minister di Finanzas Geoffrey Wever, como tambe Minister Gerlien Croes y Minister Rene Herde, a duna un update tocante e situacion geopolitico mundial y e impacto potencial riba Aruba.

   Gobierno a indica cu, aunke Aruba no tin influencia directo riba decisionnan internacional, tin un responsabilidad pa anticipa desaroyonan global y reduci nan impacto riba economia local. Tension mundial, particularmente den Medio Oriente, ta influi riba prijs di petroleo, loke por repercuti riba costo di bida y poder di compra di ciudadano.

  Minister Geoffrey Wever a destaca e importancia di maneho responsabel di finanzas publico den un contexto di incertidumbre global. Segun Wever, Aruba tin un sistema di hedging activo pa fuel oil, cu ta proteha prijs di awa y coriente te fin di aña. Sin embargo, aumento di petroleo si ta refleha den prijs di gasolin y transporte.

   Medidanan pa proteha ciudadano: Prome Minister Eman a subraya cu gobierno ya a implementa varios paso concreto pa fortalece poder di compra, specialmente pa esnan mas vulnerabel: (*) Aumento di pension: +500 Florin pa soltero y +1000 Florin pa pareha.  (*) Eliminacion di prima di AZV (5%) pa pensionadonan cu entrada mas abou.  (*) Introduccion di pakete di remedi casi completamente cubri.  (*) Aumentonan den sector di enseñansa. (*) Aumento di asistencia social (bijstand) y apoyo pa educacion.

   Segun Eman, e medidanan aki ta forma parti di un strategia amplio cu ta traduci na stabilidad economico den alivio directo pa pueblo.

   Gobierno lo inicia un dialogo formal cu sector priva y sindical pa logra un aumento gradual di salario minimo den tres fase, cu meta final di yega na nivel di subsistencia (bestaansminimum), manteniendo un balansa cu sostenibilidad economico.

    Preparacion pa posibel impacto: Den caso cu situacion mundial deteriora, gobierno ta considera medidanan temporario manera:

(*) Absorba parti di aumento di costo pa un periodo limita.

(*) Pospone inversionnan no-urgente pa libera recurso.

(*) Ahusta politica rapidamente segun desaroyo internacional.

   Un reciente anuncio di tregua internacional a contribui temporalmente na reduccion di prijs di petroleo, pero gobierno ta keda vigilante.

   Economia stabiel, pero vigilancia continuo: Apesar di incertidumbre global, economia di Aruba ta mustra stabilidad. Turismo ta sigui crece y, hasta awor, no tin impacto significativo riba crecemento economico.

   Gobierno ta reuni regularmente pa monitorea situacion y mantene comunidad informa.

   Prome Minister Mike Eman a conclui cu gobierno ta mantene su enfoke riba proteha comunidad di Aruba, maneha finanzas di forma responsabel y adapta rapidamente na cambionan mundial, pa asina salvaguarda stabilidad y bienestar di Aruba.