Disfruta di campamento sin lubida proteccion y responsabilidad pa nos naturalesa

Directie Natuur en Milieu cu yamada urgente:

ORANJESTAD (AAN): E temporada di campamento 2026 t’ey caba, e comunidad di Aruba ta preparando pa disfruta di nos lama, costanan y nos aire liber. Den cuadro di esaki, Directie Natuur en Milieu (DNM) ta haci un yamada urgente na tur campado pa no solamente cumpli cu e reglanan stipula den nan vergunning, pero pa e aña aki nos tin un enfoke special riba e proteccion di nos flora y fauna.

Nos naturalesa ta e cas di hopi especie cu net den e temporada aki ta den un etapa critico di nan bida. P’esey, DNM ta pidi cooperacion di cada ciudadano pa tene cuenta cu e siguiente puntonan esencial:

1. Proteccion di Turtuga di Lama

E temporada di campamento ta coincidi cu e tempo cu turtuganan di lama por subi tera pa pone nan webo. Corda cu tur e sortonan di turtuga di lama ta protegi pa ley y cu nan ta bin di leu pa pone nan webonan y si nan haya nan stroba pa hende y/of luz artificial nan lo por bay y no logra pone nan webonan. Tene cuenta cu e siguiente puntonan.

• Respet: Si bo ripara cu tin presencia of un neishi di tortuga di lama, semper mantene distancia. Yama hotline di Turtugaruba.
• Luz: Evita luznan artificial of fuerte banda di lama anochi, pasobra esaki ta desorienta e turtuganan.
• Obstaculo: No laga stoel, mesa of laga structuranan traha cu santo blanco den caminda unda e turtuga mester pasa. Tampoco coba buraconan den e santo blanco.

2. Parhanan ta bin di leu y ta den nan Temporada di Broei

Hopi di nos parhanan local y specialmente  esun migratorio ta uza e areanan di costa pa descansa y broei (pone webo).

• Trankilidad: Evita zonido extremo of drenta den areanan cu ta identifica como luga di neishi di parha.
• Cachonan: Si bo tin mascota, tene nan bou di control pa nan no spanta of destrui neishi di parha cu ta broei na tera.

3. Preservacion di Matanan y preveni di Erosion

E matanan na nos costanan tin un funcion vital. Tin hopi sorto di mata ta crece na nos costa manera matanan di mangel, yerbanan costal y di lama como tambe kwihi y otro.

• No Cap: Ta strictamente prohibi pa corta of "cap" matanan pa habri espacio. E matanan aki ta proteha nos costa contra biento fuerte den caso di mal tempo.
• No Chapi: Yerba y matanan abou ta esnan cu ta wanta e santo na su luga. Ora ta chapi e yerbanan aki, ta acelera e proceso di erosion, causando cu nos beachnan ta perde nan santo mas rapido.

4. Maneho di Sushi

Campamento no mester laga ningun rastro negativo. Bo ta trece cosnan cu ta genera sushedad, corda bay cu esakinan bek cas pa tira afo den bari di sushi.

• Recohe bo sushi: Hiba bo mes saco di sushi y percura pa e area keda mas limpi cu cu bo a hay’e. Sushi cu keda atras ta bira peliger mortal pa nos fauna.

Un Compromiso Comparti E meta ta pa nos tur disfruta di e bunita tradicion di campamento, pero sin compromete e futuro di nos recursonan natural. Nos ta pidi e comunidad pa ta e prome pa vigila y proteha nos medio ambiente.

Pa mas informacion tocante e reglanan di naturalesa of pa raporta cualkier incidente di urgencia, por tuma contacto cu e instancianan concerni. KPA, BCI y DNM, DNM na This email address is being protected from spambots. You need JavaScript enabled to view it.

Laga nos campa cu consenshi pa nos naturalesa keda sano pa e generacionnan cu ta bini!