Presentacion di ‘Fieldlab’ ta enfoca riba prevencion y seguridad den comunidad

ORANJESTAD (AAN): Prome Minister Mike Eman a ricibi delegacion na Bestuurskantoor pa un presentacion di e iniciativa “Fieldlab”,

un modelo di colaboracion cu a proba su efectividad na Hulanda y cu ta enfoca riba fortalecemento di seguridad den comunidad.

E iniciativa “Fieldlab” ta basa riba un colaboracion entre polis, Ministerio Publico (OM) y Reclassering, cu enfoke principal riba prevencion. Meta ta pa reduci presencia di arma di candela riba caya, disminui recidivismo y guia persona cu ta involucra den criminalidad pa cambia nan rumbo di bida.

Durante e encuentro, tambe a conta cu presencia di representante di comunidad y dirigentenan di bario, incluyendo sector di KPA, fortaleciendo e dialogo entre autoridadnan y comunidad.

E presentacion ta alinea cu e vision di Gobierno di Aruba pa sigui traha activamente den bario, cu enfoke riba e principio di “Bon Comun”, unda bienestar colectivo y prevencion ta central.

Den e marco aki, Prome Minister Eman, kende durante su trayecto politico a enfatisa repetidamente e importancia di comunidad fuerte como base pa siguridad, ta continua impulsando iniciativa cu ta combina prevencion cu accion concreto.

E iniciativa ta forma parti di un esfuerso mas amplio den estrecha colaboracion cu Ministerio di Husticia pa aborda problematica di arma di candela y fortalece seguridad den bario.

Gobierno di Aruba ta mira e modelo di “Fieldlab” como un paso importante pa explora solucionnan sostenible, cu enfoke riba colaboracion, intervencion tempran y reintegracion social.