Dos homber condena na mas cu 7 aña di prison pa ta envolvi den importacion di riba 700 kilo di droga

Hues ta haya nan culpabel pero no a sigui exigencia di Fiscal

• Total di 379 kilo di marihuana y 335 kilo di cocaina
• Drentando cu boto na Eagle Beach 

ORANJETSTAD (AAN): Dialuna mainta Hues di Corte den Promer Instancia a dicidi cu e hombernan E.A. y J.S.O. ta envolvi den e importacion di 379 kilo di marihuana y 335 kilo di cocaina.  Pues un total di 714 kilo di droga.

   Esaki a sosode riba un Diasabra 8 Juni 2024, caminda Warda Costa a intercepta e boto na Eagle Beach. Fiscal a exigi 10 aña di prison pa sospechoso E.A. y 9 aña di prison pa sospechoso J.S.O. Hues a baha e castigo exigi pa Fiscal.

   Exigencia di Fiscal: Tabata dia 16 Maart 2026 tratamento di e caso a tuma lugar caminda Fiscal a bisa Hues cu e ta haya legalmente proba cu J.S.O. y E.A. ta culpabel di e importacion di lote grandi di marihuana y cocaina. Esaki a sosode 8 Juni 2024 den oranan tempran di mainta na Eagle Beach. Mas di 700 paki di droga y 3 revolver e miembronan di Warda Costa a haya den e boto. A confisca 379 kilo di marihuana y 335 kilo di cocaina.

   Na opinion di Fiscal, investigacion di Polis ta mustra claramente cu J.S.O. y E.A. tabata envolvi den e preparacion di e boto di E.A. cual a wordo uza pa importacion di e lote grandi di droga. Fiscal tambe a mustra cu tin combersacionnan cu Polis a haya riba cellular di E.A. cu ta mustra riba e importacion di droga. Fiscal a bisa Hues cu e no ta haya proba cu E.A. y J.S.O. tabatin conocemento di e 3 revolvernan y a pidi pa declara nan liber di e acusacion aki.

   Fiscal a mustra cu na aeropuerto E.A. a wordo gara dia 3 October 2024 cu dos deken cu cocaina mezcla aden den su maleta cu intencion di bay Hulanda. En total 507,7 gram di cocaina a keda confisca. Tambe Fiscal a mustra cu Polis a haya J.S.O. cu mitar bloki di cocaina. Fiscal a bisa cu e ta haya cu J.S.O. a maltrata su ex pareha na October 2024 cu un cuchiu.

   Fiscal a exigi pa E.A. 10 aña di prison y pa J.S.O. 9 aña di prison.

   Sentencia: Riba Dialuna mainta Hues a bisa cu e ta haya e hombernan E.A. y J.S.O. culpabel di importacion di lote grandi di marihuana y cocaina riba 8 Juni 2024. Warda Costa a intercepta e boto na Eagle Beach. Hues a bisa cu e no ta haya proba e acusacion di e armanan. Hues a bisa cu tin imagennan di video di seguridad caminda ta mira auto ta core trempan ta bay pa Eagle Beach. El a sigui bisa cu tin declaracion di e homber I., kende a wordo gara riba e boto, cu a reconoce riba potret E.A. y J.S.O. E homber I. a declara cu E.A. y J.S.O. tabata presente ora cu e boto a yega beach. El a bisa cu J.S.O. tabata core e auto.

   Hues a sigui bisa cu tambe tin e combersacion scucha door di Polis caminda J.S.O. ta puntra I. si e ta cla pa haci e viahe. Hues ta haya cu E.A. y J.S.O. a prepara e boto pa bay haci e viahe y nan tabata na Eagle Beach pa ricibi e droga. Hues tambe ta haya proba cu E.A a exporta cocaina riba 3 October 2024 na aeropuerto. Hues a sigui bisa cu J.S.O. a wordo haya cu un bloki di cocaina.

   Hues a bisa cu e ta haya J.S.O. culpabel di a maltrata su pareha. Hues a mustra cu J.S.O. mes a declara cu el a bebe y no ta corda.

   Castigo: Pa cu e castigo, Hues a bisa cu en total 714 kilo di droga a keda intercepta. Droga ta causa miseria den famia y fomenta criminalidad. Hues a bisa cu mester baha pisa riba criminalidad di droga. Ademas a gara E.A. na aeropuerto cu droga y tambe J.S.O. Hues a cuestiona e hecho cu J.S.O. a corta su pareha cu cuchiu mientras cu e pareha tabatin nan yiu chikito den braza. Hues a tuma J.S.O. na malo pa esaki.

   Hues a bisa cu Fiscal a exigi pa J.S.O. 9 aña di prison y pa E.A. 10 aña prison. Hues a bisa cu el a tene cuenta cu e castigonan cu esnan gara den e boto a haya, cu ta 7 aña di prison. Hues ta haya cu en principio esey ta e castigo cu E.A. y J.S.O. mester haya pero ta bin acerca e otro delitonan cu nan a haci. Hues a condena E.A. na 7 aña y 6 luna di prison y J.S.O. na 7 aña y 9 luna di prison. E droganan lo wordo destrui, e placanan lo wordo debolbe.