Parha a dal den motor di avion di Southwest cu net tabata lantando vuelo

Sonido fuerte di compressor stall riba Diasabra atardi

• Capitan a dicidi haci aterizahe bek mesora na Aruba 

ORANJESTAD (AAN): Vuelo SWA-1805 di Southwest Airlines tabatin di trempan caba un tiki retraso pa e vuelo di Aruba pa Baltimore na Merca.  E vuelo mester a lanta for di Aruba ya for di 4:50 pm.  Pero finalmente e vuelo a sali te 45 minuut despues.

   Vuelo SWA-1805 ta un Boeing 737-800, un avion cu Southwest Airlines a cuminza bula cu ne dia 13 di April 2018, pues casi 8 aña pasa.  E tin dos motor CFMI.  Pa 5:31 pm el a bandona plataforma dilanti Aeropuerto y a cuminza core bay pabao riba Taxiway.  Pa 5:32 pm e piloto a ricibi clearance pa su ruta pa Baltimore, y pa 5:33 pm Toren di Control di Aruba a dune autorizacion pa subi pista y lanta vuelo.

   Pa exactamente 5:34 pm e avion a bandona e Taxiway y a subi pista 11 di Aeropuerto di Aruba.  Mesora  e Pilotonan a throttle motornan pa nan subi, y pa 5:35 pm exacto e wielnan a bandona tera y e avion a subi.

   Sonidonan fuerte: Pero durante cu e ta subiendo, aparentemente un parha lo a bay dal den un di e motornan.  Esaki a pone cu e motor pa algun seconde a perde potencia, y esaki a ocasiona loke ta ser yama un ‘compressor stall’.  Esaki ta ocasiona un sonido extremadamente fuerte estilo explosion, mescos ora cu motor di un auto ta ‘backfire’.  Como cu e compressor stall aki ta sigui socede pa algun rato, esey ta pone cu e ‘explosionnan chikito’ aki ta sigui socede, y por bay acompaña cu chispa di vlamnan saliendo patras di e motor #1, cu ta esun banda robez di e avion.

   Ta hopi ciudadano cu ta biba den area di Mahuma, Sabana Grandi, Rooi Bosal, y Macuarima a tende e sonidonan aki.

   Mesora cockpit di e avion a stop di sigui subi, a keda bula e ora na 4.100 pia y nan a reduci e throttle di e motor aki y a pone bay na ‘idle’.  E otro motor si a sigui traha bon, y nan a haci uzo di esey pa por sigui bula.  Den prome transmision nan a core declara un emergencia, y a haci peticion pa regresa urgente bek pa Aruba.

   Approach Control di Aeropuerto mesora a duna nan ordo pa haci un circulo, bay bira te pabao di Aruba y pa nan baha nan haltura bek na 2.600 pia.  Como cu e Boeing 737-800 no tin un sistema di benta jetfuel afo, esey nifica cu nan ta djis dal un buelta y baha bek.

  Pa exactamente 5:40 pm, prome cu e avion a baha bek, personal di Aeropuerto a core bay haci un revision riba pista 11 pa check si acaso lo por haya cualkier obheto of fragmento di avion benta abao, por si acaso algo a cay riba e pista.

   Despues di a haci un birada pabao di Aruba, ya caba pa 5:44 pm e avion a establece su mes riba e sistema di aterizahe ILS di Aeropuerto di Aruba.  Mesun momento a haya confirmacion cu e pista ta liber di cualkier obheto.

   Ateriza den 12 minuut bek: Piloto di Southwest a indica cu nan lo ta haciendo un aterizahe sobrepeso, y esey nifica cu nan lo bay haci hopi uzo di brake pa stop e avion.  Pesey na final, nan lo baha di pista y keda para un banda un rato pa laga e brake y wielnan fria, prome cu nan por sigui bay na Gate.

   Ya pa 5:47 pm, e Boeing 737-800 a ateriza bek na pista 11 di Aruba, sin ningun problema.  Pero e avion a bay para na ‘Salida A’ di Taxiway pa laga e brakenan fria, y Crash Trucks di Cuerpo di Bombero a bay monitor esakinan pa evita cu e brakenan aki por pega candela.  Esnan abao a raporta cu visibelmente no por mira daño na e motor, pero e defectonan lo ta parti paden.

   Nan a keda como 9 minuut para eynan, te ora cu e brakenan a fria, y pa 5:56 pm a informa cu nan ta cla pa sigui pa para bek na Gate.

   Despues di a haci un revision di e motor, a dicidi cu e avion aki su vuelo no por sigui mas.  Vuelo SWA-1805 pues a wordo cancela, y a bay yuda tur turista haya acomodacion pa pasa anochi den Hotel.  E avion mes a keda para na Gate.

   Un emergencia cu na final a termina den ningun herido, y tur hende bek safe na tera.  E motor tin di wordo drecha, y tin chens cu awe ta un otro avion lo bin Aruba pa recoge e pasaheronan cu a keda stagna y no a yega Baltimore riba Diasabra atardi.