Jennifer Arends-Reyes ta pidi claridad riba implementacion di ley di crèche

ORANJESTAD (AAN) - Parlamentario di AVP, Jennifer Arends-Reyes, a entrega un serie di pregunta oficial na e minister corespondiente,

pidiendo informacion detaya riba e situacion actual di preparacion y implementacion di e Landsverordening Kinderopvang na Aruba. Segun Arends-Reyes, e implementacion corecto di e ley aki ta esencial pa garantiza cu tur mucha na Aruba por beneficia di un sistema di cuido infantil cu ta sigur, di bon calidad y accesibel.

   “Nos muchanan ta nos futuro. Pa e motibo ey, nos mester sigura cu cada centro di cuido di mucha ta traha segun normanan cla, cu personal capacita y cu supervision serio,” asina Arends-Reyes a expresa.

Parlamentario Arends-Reyes a pidi pa minister informa Parlamento di Aruba riba e avance actual di e proceso. E ta puntra tambe ki paso concreto a tuma desde momento cu a aproba e Landsverordening Kinderopvang y con gobierno ta prepara pa ehecut’e. Un di e puntonan principal den e preguntanan ta con ministerio lo garantiza cu e ley ta inclui normanan cla di calidad y siguridad pa tur forma di cuido di mucha.

   Jennifer Arends-Reyes ta enfatisa e papel crucial di personal den e sector. E ta puntra si e minister ta considera pa introduci rekisito minimo di educacion, formacion y certificacion pa empleado cu ta traha den centro di cuido di mucha. “Pa un sistema funciona, personal mester ta profesional y prepara, pasobra nan ta carga cu un responsabilidad grandi: cuida y forma e desaroyo di e mucha. E parlamentario a puntra tambe con lo organiza supervision y inspeccion periodico di tur centro di cuido di mucha, pa garantisa cumplimento di e ley.  Entre e preguntanan, Arends-Reyes kier sa: con ta conduci inspeccion, cu ki frecuencia y door di cua instancia. E ta expresa cu, sin control efectivo, e ley lo keda solamente un documento sin impacto real den practica.

   Otro punto importante cu Arends-Reyes a trece dilanti ta e aspecto social: centro di cuido di mucha mester ta accesibel. E ta puntra si gobierno ta contempla pa introduci, na corto plazo, algun forma di sosten financiero of subsidio pa famianan, pa hende cu ta traha y cu no tin recurso suficiente por yega na cuido di mucha, sin cu e costo ta bira un carga demasiado grandi. Parlamentario kier claridad riba con gobierno ta involucrando e sector di centronan existente. Con doño di centro, organizacion y experto ta consulta y inclui den e desaroyo di e siguiente fasenan di implementacion.  Ta pidi e minister splica con e ley lo contribui na e desaroyo integral di mucha chikito, y apoyo pa mayornan (specialmente mayornan soltero) pa por participa mas activamente den mercado laboral.

   Finalmente, Arends-Reyes a trece un pregunta moderno y practico: si gobierno of fundacionnan cu ta traha pa bienestar di mucha por stimula implementacion di un sistema digital of app pa registra presencia di mucha den kindercentra (check-in/check-out). “Nos mester un sistema cu ta proteha nos muchanan”, Jennifer Arends-Reyes a expresa pa conclui cu parlamento tin obligacion di sigura cu implementacion di ley di crèche ta haci cu seriedad y prioridad na interes di e mucha.