Wardacosta lo controla y patruya tur bahia y beachnan di Aruba den Semana Santa

Miguel Gonzalez Perret Gentil, Caribe Kustwacht”:

*E tin diferente conseho pa esnan cu  kier nabega riba lama 

ORANJESTAD (AAN)-- Miguel Gonzalez Perret Gentil, Relacionista Publico di Caribe Kustwacht, den entrevista cu Matutino DIARIO a expresa cu lama na Aruba, Curacao y Sint Maarten, ta un atraccion henter aña, pero enberdad den Semana Santa tin un subida di personanan cu ta campa na beach, y cu ta subi lama na diferente area.

El a bisa cu encuanto seguridad ta sumamente importante pa capitannan di barco tene cuenta pa tin nan permisonan concerni hunto cu nan, y e documentonan necesario tambe pa esnan cu ta navega riba un sea doo. Tambe pa zorg pa semper tin e cantidad di salbabida necesario destina na e cantidad di personanan; por ehemplo, si bo tin cinco persona riba boto, bo mester tin cinco salbabida. “Si bo no tin suficiente, e ora ey bo no ta bay cu nan”, Miguel Gonzalez Perret Gentil, a expresa.

Ademas, e ta pidi  pa percura pa tin suficiente awa semper,  zorg pa bay cu un telefon full carga, pa bo VHF radio ta trahando pa den caso di emergencia bo por uza esaki pa bo comunica. “Tambe por yama libremente 913 cu ta nos number di emergencia di centro maritimo operacional di Warda Nos Costa”, Gonzalez a agrega.

E ta aconseha tambe pa tin suficiente protector solar y awa di mes, pa evita deshidrata.

“Tene cuenta ora bo ta bay riba lama, sea pa pisca, landa of navega un rato, informa un familiar tambe, unda bo ta bayendo, anto bisa mas of menos cuant’or bo tin planea pa bin bek. Si famia ta ripara cu bo no a bin bek pa e momento ey, nan por tuma accion, yama autoridadnan, yama wardacosta. Nos lo ta controlando y patruyando den tur e bahianan y e beachnan di Aruba, entre otro Mangel Halto, pero tambe na Savaneta, San Nicolas, high rise, Barcadera. Nos lo controla tur caminda, p’asina nos purba yuda p’e siman di Semana Santa cana bunita, cu ta e aspecto di mas importante”, Miguel Gonzalez, PR di Caribe Warda Costa, a señala.