Francis Toussaint di Brandweer Aruba:
ORANJESTAD (AAN): Durante e periodo di Semana Santa, hopi ciudadano di Aruba ta sigui e tradicion di campa sea banda lama of na diferente luga riba e isla. E momento aki di reflexion y union familiar ta trece alegria, pero tambe responsabilidad. Pa esaki, ta esencial cu ciudadanonan cu ta bay campa, tuma medidanan preventivo y haci preparacionnan adecua, sea na cas prome di sali pa un siman, of na e sitio unda ta bay campa, pa garantisa siguridad, salud y bienestar di tur.
Señor Francis Toussaint di Brandweer Aruba, den un entrevista recien, a comparti algun recomendacion importante pa tene na cuenta. Prome cu sali for di cas, si no tin hende cu lo keda tras cu mester cushina, ta recomenda pa cera e boter di gas. Mescos tambe, ta importante pa cera e meter di awa, pa evita cu, den caso di un liek, awa sigui core durante e periodo cu no tin hende na cas. Esakinan ta medidanan basico pero nesesario pa preveni incidentenan cu mester servicio di brandweer.
Pa esnan cu ta bay campa, señor Toussaint a laga e siguiente conseho: “Tene cuenta cu reglanan di siguridad. Mayornan, pone bon atencion y paga tino riba boso yiunan menor, specialmente si nan ta drenta lama of pool. No laga nan bay landa nan so, pa preveni cualkier tragedia mientras boso ta disfrutando di e ambiente.”
Na final, el a indica cu Brandweer Aruba tin e isla dividi den tres area y lo ta activo cu rondanan di control durante e temporada di campamento, pa garantisa siguridad di tur ciudadano.
