Gobierno ta implementa ‘Three Lines Model’ pa fortalece maneho financiero

Minister Geoffrey Wever:

*Esaki lo garantisa cu Aruba ta “in control”

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, recientemente a presenta na Parlamento un update amplio riba progreso di implementacion di e Three Lines Model (3LM), un componente clave den ehecucion di Landspakket Tema A cu ta enfoca riba fortalece e maneho di finansa publico y garantisa cu Aruba ta “in control”. 

Implementacion di e modelo aki ta representa un paso structural den modernisacion di gobierno, cu enfoke riba claridad di responsabilidad, control interno efectivo y transparencia den tur proceso financiero. Den e structura nobo, e prome linea (cada departamento riba nan mes) ta asumi responsabilidad directo pa riesgo y control den operacionnan diario; e di dos linea, ehecuta door di e Steunpunt Interne Beheersing (SIB), ta fortalece supervision y guia profesional; mientras cu e di tres linea, e Centrale Accountantsdienst (CAD), ta garantisa control independiente y auditoria di calidad. 

Te cu maart 2026, Aruba a logra progreso concreto den implementacion di e modelo. Di e dies proceso financiero central cu ta forma parti di e reforma, seis ya ta completamente operacional, cu personal capacita y entrena pa traha den un sistema moderno y standarisa. Ademas, e modelo ta wordo introduci den 15 departamento di gobierno cu ta representa e parti mas grandi di entrada y gasto di gobierno, sigurando impacto directo riba e  maneho financiero total di pais. 

Un elemento esencial den e proceso ta e consolidacion legal di e modelo. Actualmente ta den fase final un landsbesluit cu lo defini claramente e rol y responsabilidad di cada linea, fortalece e base huridico y garantisa sostenibilidad di e sistema. Raad van Advies a duna su conseho, y un version final lo wordo presenta pronto na Conseho di Ministernan pa aprobacion final. 

Na mes momento, gobierno a tuma paso decisivo pa fortalece capacidad institucional. E SIB a wordo formalmente estableci como un departamento principal den Directie Financiën, cu un rol central den monitoria, coaching y guia di e diferente servicionan publico. Paralelamente, inversion den capital humano ta sigui forma un prioridad. Cu introduccion di e programa digital E-LOFA, 99 empleado a inscribi den prome ronda y 68 a completa e trayecto exitosamente, aumentando conocimiento y competencia den maneho financiero publico. 

Minister Geoffrey Wever a enfatisa cu e progreso aki ta  alinea directamente cu e vision di e Programa di Gobernacion AVP-FUTURO 2025-2028, unda bon gobernacion, disciplina financiero y transparencia ta forma e base pa desaroyo economico duradero. 

“Nos ta traha sistematicamente pa logra un gobierno cu ta funciona a base di control, responsabilidad y confiansa,” minister Wever a declara. “E implementacion di e Three Lines Model no ta solamente ta un reforma tecnico, sino un cambio fundamental den cultura di maneho publico, unda tur decision ta basa riba control, transparencia y resultado.” 

Minister Wever a agrega: “Cu e base legal, institucional y humano cu nos ta construyendo awo, nos ta crea e condicionnan pa un opinion positivo riba cuenta anual den futuro y pa un sistema financiero cu por sostene crecemento economico di Aruba a largo plazo.” 

A pesar di e progreso significativo, minister Wever tambe a reconoce e reto existente, particularmente e escasez di personal cualifica den sector financiero. Pa enfrenta esaki, gobierno a opta pa un combinacion di solucionnan, incluyendo outsourcing temporario di cierto funcionnan di auditoria pa periodo 2026-2028, mientras cu simultaneamente ta inverti den adkisicion di personal  y entrenamento “on-the-job” pa fortalece capacidad interno. 

Implementacion di e Three Lines Model ta confirma e compromiso di gobierno pa sigui avansa cu reforma structural den finansa publico, cu meta pa ta un gobierno confiabel, eficiente y “in control”, cu ta contribui directamente na stabilidad economico, confiansa internacional y bienestar di cada ciudadano di Aruba.