Gobierno ta sostene dialogo cu Comision Proteccion Flora y Fauna riba conservacion sostenibel

ORANJESTAD (AAN): Prome Minister Mike Eman a sostene un encuentro recientemente na Bestuurskantoor cu Comision Proteccion Flora y Fauna (Natuurbescherming commissie),

hunto cu conseheronan di ministerio di naturalesa y medio ambiente, pa dialoga riba impacto y proteccion di naturalesa na Aruba.

E reunion a enfoca riba diferente aspecto relaciona cu conservacion di flora y fauna local, incluyendo evaluacion di impacto di actividadnan humano riba ecosistema y e necesidad pa mantene un balans entre desaroyo y proteccion ambiental.

Comision Proteccion Flora y Fauna ta un organo independiente cu ta asesora minister responsabel pa naturalesa riba proteccion di naturalesa indigena na Aruba. E comision, estableci bou di e Ley di Proteccion di Naturalesa, ta duna conseho riba medida y excepcionnan (ontheffingen) relaciona cu specie protegi.

Durante e encuentro, a intercambia pensamento riba con pa fortalece e politica y mecanismo existente pa garantisa conservacion sostenibel di biodiversidad di Aruba.

Gobierno di Aruba ta considera e dialogo continuo cu expertonan como esencial pa sigura cu decisionnan ta basa riba conocemento tecnico y pa proteha patrimonio natural pa generacionnan futuro.