Directie Natuur en Milieu ta uni na e iniciativa  mundial ‘Earth Hour 2026’

ORANJESTAD (AAN):  Directie Natuur en Milieu (DNM) ta anuncia cu e aña aki atrobe nan lo forma parti di e iniciativa ambiental mas grandi na mundo: WWF-Earth Hour.

Como simbolo di compromiso cu nos naturalesa y clima, DNM lo paga e luznan di edificio monumental, Uncle Louis Store na San Nicolas unda DNM ta situa.

Detaye di e evento:

Earth Hour ta un iniciativa anual di World Wide Fund for Nature (WWF) cu a cuminsa na 2007. Meta di e campaña internacional aki ta pa pidi atencion pa e problema di cambio di clima y e importancia di proteha nos naturalesa.

• Fecha: diasabra, 28 di maart 2026.
• Ora: Entre 20:30 y 21:30.
• Accion: Paga tur luz di e edificio pa un ora largo.

Un yamada na comunidad

DNM, hunto cu e team di WWF-Hulanda, ta curasha tur instancia di gobierno, empresanan y specialmente comunidad na Aruba pa uni na e muestra di accion pa conscientisacion poderoso.  Pa un ora , nos ta pidi pa “switch off” e luznan cu no ta esencial pa asina pone e solucionnan pa nos clima riba mapa.

E aña aki, e meta di WWF ta pa amplia e cantidad di edificio y ‘landmarks’ den Reino cu ta participa, pa asina duna un mensahe mas fuerte e aña aki tambe.

Con bo por participa?

• Na cas: Paga bo luznan parti paden y pafo di cas entre 20:30 y 21:30.
• Digitalmente: Comparti bo participacion riba social media uzando e hashtag #earthhour.
• Material: Pa esnan cu kier promove esaki den nan mesun organisacion, por uza e"toolkit" digital (cu flyer y imagen) via e website wwfdutchcaribbean.org/earthhour.

Paga luz pa naturalesa y demostra cu Aruba tambe ta consciente di e balor di nos medio ambiente.