Minister Geoffrey Wever a entrega e ley pa crea Fondo di Inversion na Parlamento

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, ta anuncia cu diabierna ultimo a haci entrega oficial na

Presidente di Parlamento di Aruba e concepto di ley pa crea un Fondo di Inversion pa Aruba, incluyendo e “Nader Rapport”. Despues cu Gobierno a prepara e ley pa crea e Fondo di Inversion a mande pa conseho di Raad van Advies riba e concepto di ley, y despues cu Gobierno di Aruba a ricibi e conseho di Raad van Advies Gobierno a traha e “Nader Rapport”, cu diabierna ultimo a keda cla y a wordo entrega na Presidente di Parlamento Sr. Marlon Sneek. Parlamento awo lo por studia e ley pa crea e Fondo di Inversion y haci pregunta por escrito na Gobierno cu mester wordo contesta door di Gobierno, pa despues Presidente di Parlamento por pone un fecha pa e ley pa crea e Fondo di Inversion por wordo trata den Parlamento di Aruba.  Gabinete AVP-FUTURO ta cumpli cu e creacion di un Fondo di Desaroyo manera palabra den e Programa di Gobernacion 2025- 2028.

Articulo 39 di Ley di Comptabilidad ta prescribi cu un “begrotingsfonds” ta wordo crea via un ley. E Fondo di Inversion ta un instrumento di maneho di gobierno pa cada aña pone e sumanan publico disponibel y inverti esakinan na beneficio di Aruba su desaroyo.

Como instrumento di maneho e Fondo di Inversion lo facilita inversionnan di gobierno. Areanan di prioridad ta entre otro inversionnan den embeyecemento di tur districtonan, enseñanza, centro di Oranjestad y San Nicolas y vecindario, casnan social y pa adultonan mayor, transicion di energia y desaroyo di tereno di e ex- refineria.

Gobierno tin dos rol importante den desaroyo di Aruba. Banda di facilita e condicionnan necesario pa stimula inversionannan di sector priva, gobierno tambe tin cu duna contenido concreto na su rol di haci inversionnan. Inversionnan publico crea banda di actvidadnan economico ta duna sector priva y inversionistanan internacional e confianza y siguranza necesario pa por sigui inverti den tur sectornan di nos economia. Esaki ta forma parti di e vision y maneho di Gabinete AVP-FUTURO pa duna e beneficio di desaroyo economico bek na comunidad.

Gabinete AVP-FUTURO ta gradici Departamento di Legislacion y Asunto Huridico y Departamento di Finansa pa e trabao pa traha e concepto di ley y memorie of toelichting pa Aruba haya su Fondo di Inversion. E creacion di e Fondo di Inversion ta parti di esfuerzo colectivo pa ehecuta e Programa di Gobernacion 2025- 2028. Manera acorda den e Programa di Gobernacion 2025- 2028 riba pagina 4 Crea un Fondo di Inversion, Gabinete AVP-FUTURO ta cumpli.