Aruba mester ta prepara pa evita subida di prijsnan ora desgracia yega

Segun Hubert Dirks di Compra LTD:

ORANJESTAD (AAN): Den un entrevista recien cu DIARIO, Hubert Dirks di Compra LTD, a duna di conoce cu subida di prijs pa productonan ta depende di e desaroyonan di e situacion entre Merca y Iran. Loke ta hunga un rol mas importante ta con largo esaki ta bay dura. Si e ta bay dura pa mas di un aña y prijsnan eyfo ta bay subi entre 40 pa 100 porciento, lo adapta y subi prijs di productonan. 

El a remarca sinembargo, cu si e situacion no dura largo y ta spera cu e problema no sigui desaroya, y aunke prijsnan eyfo subi un poco, Compra LTD tin un buffer y lo no subi prijs. Aunke por tin otro comerciante cu si ta subi prijs. “Ora cu prijsnan subi internacionalmente, nos tin espacio pa absorb’e. Pero si e ta bay bira hopi largo y nos ta ripara cu full Medio Oriente ta envolvi den e problema y Europa cay aden, e ora si nos tin pa tuma otro accion”, el a expresa. 

Segun señor Dirks, den situacionnan asina semper mester bay bek na importa productonan basico cu lo ta na bon prijs pa e consumidor y no importa productonan di luho. 

El a enfatisa sinembargo, cu e discusion aki mester tuma luga prome cu cosnan bay malo y guera start, haciendo referencia na un storia biblico na unda cu e pueblo di Israel a prepara durante e añanan gordo pa e sobrevivi durante e añanan flaco. “Ta ora cu cos ta bon, ta e ora ey ta momento di traha plan, pa ora cos empeora, por acapara e tempo cu cos ta malo. Pero na Aruba nos ta hopi short term y ora desgracia yega, nos no ta prepara”, el a enfatisa. 

Señor Dirks a indica cu e ta premira cu e situacion entre Merca y Iran ta bay dura mas largo cu Merca mes a pensa. Y Gobierno di Aruba mester tuma pasonan mirando cu e trend ta mustra cu prijsnan lo bay subi como tambe pa proteha canasta basico. Entre otro, el a menciona, por reduci of no cobra invoerrechten y BBO riba cierto producto.