Dos victima di hacking y chantahe na yoramento a expresa e drama cu nan a pasa aden y a keda afecta

Momentonan emocionante den sala di Corte

ORANJESTAD (AAN): E caso penal cu Ministerio Publico a cuminsa contra e homber D.E. pa hacking y chantahe di tres dama, caminda un di e damanan hasta a bira victima di violacion, tabata hopi emocionante. Por a sinti e drama cu e damanan S. y T. a pasa aden, ora nan a expresa nan mes.

VICTIMA DI VIOLACION A KEDA AFECTA

E dama S., bibando na Hulanda, via video conference a sigui e caso. Por a mira cu S. tabata acompaña pa un amiga, kende tabata consola S. kende cada rato tabata yora, ora cu Hues tabata interoga D.E. riba e violacion di S.

    Na dado momento, Hues a bay over na e demandanan di daño. Ta asina cu e dama S. y e dama T. a haci uso di e derecho di expresa nan mes. E dama S. a manda un carta y Hues a lesa esaki den Corte.

    Den su carta, S. ta mustra cu door di e chantahe di D.E., e ta sinti hopi kibra y cu e ta wordo domina. E stalking a perhudica S. hopi y cu el a bira hopi depresivo. El a keda afecta y no por actua normal. Tur esaki a perhudica S. den su estudio na Hulanda. El a pidi Hues pa haci husticia pa tur loke el a pasa aden pa un periodo largo. S. a bisa den e carta cu e ta spera cu esaki no pasa cu ningun hende. El a demanda 28.674 florin cu ta encera gastonan cu e mester a haci pa tratamento psicologico y medicamento.

   Ta asina cu e gastonan ta sigui ainda. E hacking y chantahe di D.E., a perhudica S. den su estudio. E financiamento di e estudio cu tabata calcula pa 1 aña a bira 2 aña. A lo largo, S. lo mester paga mas y lo tarda un aña mas promer cu e por cuminsa traha. S. a demanda mas cu 84 mil florin na daño inmaterial. Esaki pasobra e ta sinti su mes insigur, door di e hacking y chantahe di D.E.

VICTIMA KIER A MATA SU MES

   E dama T.(26), hopi emociona a bisa cu desde su 21 aña, e tabata victima di D.E. Na yoramento el a bisa cu durante 2 aña of mas, D.E. a causa angustia y menaza na dje door di hack. Na yoramento el a bisa cu door di menaza, e tabatin miedo cu e lo perde tur cos. E tabata sinti berguenza y a bay biba na Hulanda siendo cu su oma ta malo na Aruba.

   El a bisa cu te awe e ta sinti dolor ora e pensa riba e caso aki caminda e tabata sinti cu e tabata wordo uza y D.E. tabata hari y no a pensa pa stop y tabata sigui.

   T., hopi emociona a bisa cu na dado momento e tabata kier a mata su mes. El a bisa cu e no tabata kier mira su mes riba potret pasobra e no ta reconoce su mes.

   El a bisa cu e no tabata por a come y tabata sinti su mes hopi malo. T. a bisa cu despues cu D.E. a wordo deteni, D.E. a manda mensahe cu husticia lo no por haci nada. Despues D.E. a bay manda mail pa doño di trabao di potretnan di T. Esaki a causa cu doño di trabao a subi seguridad na trabao mirando e seriedad di e caso y pa proteha T. y otro empleadonan. Tambe D.E. a mail potretnan pa e pareha di T. y e mayornan di T.

1. a bisa Hues, tur esaki door cu D.E. no a mantene su mes na e prohibicion di Hues Comisario pa no tin contacto cu T.
2. a expresa na Hues: “Nos como victima mester keda biba pa henter bida cu e menaza di D.E. Por a nota cu e victima S. tambe tabata yora. T. a bisa Hues cu D.E. su menazanan ta hopi fuerte y duradero pa henter famia y conocirnan di e victima. Abogado mr. Gravenstijn a presenta e demanda di daño cu ta 25.790 florin cu ta encera tratamento cu T. ta hayando.

Por a ripara cu den sala di Corte, e declaracion di S. y e expresionnan di T. a afecta tur presente.

Dia 24 April 2026 lo por spera decision di Hues.