Apertura di oficina ‘Ban Studia y EducationUSA’

*Lo brinda guia y informacion na studiantenan cu kier sigui estudio avansa na Aruba of exterior

ORANJESTAD (AAN): Durante un encuentro cu prensa diabierna atardi, pa anuncia e apertura oficial di oficina ‘Ban Studia y EducationUSA’, señora Rebecca Naddall, coordinador di Ban Studia, a destaca cu e oficina nobo aki ta habri pa henter comunidad—tanto mayor como studiantenan—cu kier haya informacion y guia pa sigui estudio avansa, sea na Aruba of den exterior, entre otro den region, Hulanda, Merca of Canada. 

El a resalta tambe cu Gobierno a firma un MOU cu varios universidad na Merca, loke ta haci e proceso mas facil y accesibel pa studiantenan di Aruba. Na luga di paga tarifanan internacional halto, studiantenan lo beneficia di un tarifa reduce, y nan ta aproximadamente mita di e costo usual pa studiantenan internacional na Merca.

El a bisa tambe cu e edificio mes a wordo inaugura dialuna mainta, y awo e ta cla pa cuminsa brinda guia y informacion na studiantenan cu kier sigui studia na Aruba of den exterior.