Libertad no ta un regalo, e ta un responsabilidad

Parlamentario Evelyn Wever-Croes

ORANJESTAD (AAN):  Durante e reunion solemn den cuadro di Himno y Bandera den Parlamento dia 18 di maart, lider di fraccion di MEP a hiba un discurso relatando e historia, e presente y e futuro.

“Awe nos ta celebra 50 aña di Dia di Himno y Bandera, y 40 aña di nos Status Aparte. Dos logro sumamente importante pa nos pueblo. E deseo di nos pueblo pa para riba su propio pia, tabata un deseo cu a wordo vocifera pa prome biaha na principio di siglo 20, ora miembronan di Raad van Politie a cuminsa alza nan bos contra e trato desigual cu Aruba tabata ricibi.

Den añanan 40, lidernan manera Henny Eman, Shon A Eman y Juancho Yrausquin a encamina e proceso y a reuni 2147 firma pa entrega na Hulanda riba 18 di maart 1948. Mi welo tambe tabata uno di esnan cu a firma. Su decepcion, mescos cu di hopi otro, tabata grandi ora cu despues di entrega di e firmanan, e lucha a wordo bandona.

Te den añanan 70 ora Betico Croes a drenta e arena politico y a dedica su bida na realisa e anhelo di nos pueblo pa ta liber. Tabata un lucha tenas, un lucha duro, den cual hasta sanger a wordo derama.

Un pueblo cu kier ta liber, mester di su propio simbolonan di identidad y libertad. Y asina, 50 aña pasa, nos a inaugura nos himno y nos bandera. Ami mes tabata den stadion e dia ey; un experiencia unico, yena di emocion y orguyo. Cu esaki, Betico Croes a duna un dimension nobo na e fecha di 18 di maart, y Aruba a cuminsa celebra e fecha aki pa prome biaha, y awe pa di 50 biaha.

E lucha a continua y a bira mas intenso. Betico Croes y tur esnan cu a lucha hunto cun’e a wordo boycotia, nan a wordo humiya, tanto localmente como na Hulanda. Pero nan a sigui firme.

Y asina, riba 12 di maart 1983, durante un Ronde Tafel Conferentie, e palabranan historico di e premier hulandes Ruud Lubbers a resona: “de kogel is door de kerk”. Cu esey, caminda pa nos Status Aparte a wordo habri.

Aruba a logra su Status Aparte riba 1 di januari 1986, aunke cu e condicion cu independencia lo sigui riba 1 di januari 1996.

40 aña pasa, nos a bira pais. E anhelo di nos pueblo a wordo realisa. Pero e arquitecto di nos libertad, Betico Croes, no a biba pa mira e momento aki. El a entrega nos e yabi di e cas cu yama Pais Aruba, pa nos biba aden, cu e responsabilidad pa cuida y conserva loke el a logra.

Sinembargo, e lucha no a caba ey. Ainda tabata tin e condicion di independencia colga riba nos cabes, te na 1993, ora Nelson Oduber a logra kita e fecha di independencia, haciendo cu nos Status Aparte a bira un realidad firme y duradero.

Nos Status Aparte a trece progreso y bienestar pa nos pais. Den 40 aña, nos a demostra cu nos mes por maneha nos pais. Si, tabata tin momentonan cu rumbo no tabata corecto,  ora debe a redobla por ehempel, pero nos mes a coregi e rumbo. Awe, Aruba ta wordo reconoci, tanto localmente, den Reino, como internacionalmente, pa su vision y maneho financiero

Awe, 40 aña despues, nos libertad y nos autonomia ta bou presion atrobe. Pesey, mi no ta kere cu e discusion di awe mester ta riba ken a logra nos Status Aparte.

E pregunta cu awe si ta relevante, e pregunta cu nos tur mester haci nos mes, ta: ken ta para awe pa defende, conserva y mantene nos Status Aparte?

Pasobra Libertad ta no ta un regalo, e ta un responsabilidad. Libertad no ta algo cu bo ta logra un biaha y ta keda pa semper.

E ta algo cu mester wordo defende tur dia

Mi kier finalisa enfocando riba e palabranan di e di tres couplet di nos himno: Grandesa di nos pueblo ta su  gran cordialidad. Cu Dios por guia y conserva su amor pa libertad”