Prijs di productonan fresco manera fruta y berdura por subi substancialmente den e proximo simannan

Segun Hubert Dirks di Compra LTD:

*Desaroyo mundial ta hopi negativo pa siguridad y prijs di cuminda 

ORANJESTAD (AAN): Segun Hubert Dirks di Compra LTD, e desaroyonan mundial ta hopi negativo pa siguridad y prijs di cuminda na Aruba como un isla cu ta depende totalmente di importacion. Den un entrevista recien, el a splica cu nos ta Importa via barconan, y barco ta uza combustibel. Y prijs di combustibel ta subiendo cada dia. Y mas e prijs subi, mas caro e prijs di cuminda ta bay ta.

Tambe señor Dirks ta cuestiona si lo haya tur producto cu kier importa. Esaki, segun e, ta pa motibo cu cierto momento por bin scarcedad y Aruba lo tin pa paga e prijs mas halto door cu nos ta importa hopi menos compara cu paisnan hopi mas grandi.

Segun e, e silencio di Gobierno riba e tema aki tambe ta preocupante. Den caso cu e situacion escala, mester bin cu un plan di emergencia si cos bay malo, pa sa con pa ataca e situacion.

El a menciona cu Gobierno no mester solamente papia riba ‘Food Safety’ pero di ‘Food Security’. Esaki ta encera pa Aruba ta prepara cu pa un tempo largo, tin cuminda suficiente pa pueblo. El a remarca cu el a pone esaki na atencion di Gobieno varios biaha, sinembargo, no ta haya oido. 

Dirks a menciona un lista di algun producto cu segun e, lo sinti e efecto di subida di prijs mas lihe. Entre otro fruta y berdura fresco fresco cu ta bin di Miami tur siman. Esakinan ta wordo transporta for di California pa Miami cu truck cu ta uza combustibel. Si combustibel subi, carga ta subi, prijs tambe lo subi aki na Aruba. Carga por subi hasta bira dobel pa motibo cu combustibel ta subi. “E tin un ‘snowball effect’ cu sigur productonan fresco por subi substancialmente den e proximo simannan”, señor Dirks a enfatisa.

Segun e, productonan cu ta bin di mas leu entre otro for di Brazil, lo por subi mas ainda mirando cu prijs di combustibel ta subi. El a expresa cu lo bin cambionan den futuro y mester tene cuenta di e inflacion cu lo bin pasobra nos ta importa inflacion door di paisnan for di unda nos ta importa cu mester subi nan prijsnan primeramente pa motibo di e situacion mundial actual.