Alex ta luchando pa recupera y ta mustrando avance significativo

Di situacion critico pa speransa:

*Mucha di 5 aña a keda lubida den auto cera bou di calor extremo

*Caso a conmociona Aruba profundamente 

ORANJESTAD (AAN): E mucha homber di 5 aña cu a bira victima di un caso grave di heat-stroke na San Nicolas, despues di 3 siman di e sucedido lamentabel, ta mustrando señalnan positivo di recuperacion despues di a wordo transporta cu Air Ambulance pa Bogotá, Colombia, pa tratamento medico specialisa.

Segun informacion recien, e estado di salud di Alex Flores a mehora significativamente den e ultimo dianan. Su mayornan ta confirma pa medio di un video publica riba red social cu e proceso di recuperacion ta bay den un direccion satisfactorio, aunke e ta keda bou di observacion pa preveni cualkier complicacion.

Den e video por mira Alex hunto cu su mayornan den su proceso di rehabilitacion. Den e video, e criatura ta mustra movimento y reaccionnan positivo como resultado di e terapia cu e ta hayando, loke ta un señal importante di progreso despues di e situacion critico cu el a pasa aden.

E caso aki a conmociona Aruba profundamente, despues cu e mucha a keda lubida den un vehiculo cera bou di calor extremo, resultando den un heat-stroke severo cu a pone su bida den peligro. Despues di tratamento inicial na ImSan y mas despues na Dr. Horacio Oduber Hospital, a dicidi pa transferi e mucha pa Colombia pa cuido mas avansa. 

Caso: riba un dia hopi cayente di Diamars 25 di februari, e mucha homber di 5 aña a keda lubida den un Van di transporte di un Crèche despues di scol. E chauffeur a staciona e vehiculo, cera tur porta y bentana, sin percura cu e mucha tabata sinta patras.

E criatura a keda cera den calor extremo pa mas di un ora, unda temperatura den e auto por a yega te 50–60°C, causando un heat-stroke severo. Su condicion a bira critico, cu daño na organonan y problema cu curason.

Mas laat e tata a yega pa busca su yiu, y ora nan a realisa cu e mucha no tabata paden, nan a hay’e den e Van, ya sin tino. E mucha a wordo hiba rapidamente pa Servicio di Emergencia na ImSan, unda dokternan a traha duro pa stabilis’e.

Despues, cu ayudo di polis pa habri caminda, el a wordo transporta pa hospital. Su condicion a keda critico den ICU, y posteriormente nan a mand’e cu Air Ambulance pa Colombia pa tratamento mas avansa.

Autoridadnan ta sigui investiga e sucedido, mientras cu comunidad ta keda uni den apoyo na e famia. Hopi hende a expresa alivio y gratitud pa e progreso di e criatura, y ta sigui manda nan bon deseo pa un recuperacion completo.