Pa final di 2028 Aruba por tin un prizon nobo

Segun specialistanan di UNOPS, Rogelio Voges y Ione Rodriquez:

Un sistema coreccional mas eficiente, moderno y enfoca riba rehabilitacion 

ORANJESTAD (AAN): Durante conferencia di prensa dialuna mainta di Gobierno di Aruba, Minister Arthur Dowers hunto cu specialistanan Rogelio Voges y Ione Rodriquez, a presenta oficialmente e resultado di un estudio tecnico independiente, realisa door di United Nations Office for Project Services (UNOPS), cu tin como meta modernisa e sistema coreccional di Aruba, Korrektie Instituut Aruba (KIA).

Durante e presentacion, e specialistanan di UNOPS a presenta e estado actual di KIA y e posibel solucionnan pa fortalece y modernisa e instituto coreccional. E estudio a wordo haci riba peticion di Gobierno di Aruba.

E resultado di e estudio a enfoca riba e maneho y costo pa sostene mehoracion den un sistema nobo. Segun Voges, e meta no ta solamente pa amplia capacidad, pero pa crea un sistema mas eficiente, moderno y enfoca riba rehabilitacion.

Un concepto clave cu a ser presenta ta un modelo di “campus”, cu ta sigui standarnan internacional ora ta trata di rehabilitacion y di maneho y operacion di un fasilidad di detencion. E ta wordo mira como “prizonnan den un prizon”, di manera cu por move y ahusta facilmente segun necesidad. Segun Voges, e sistema aki ta sostene un rehabilitacion mas efectivo y tambe un control y supervision optimal pa e personal di KIA.

Segun Rodriquez, pa un pais chikito manera Aruba, un sistema cu por adapta na diferente tipo di detenido ta esencial pa logra rehabilitacion efectivo. Ademas, e estudio ta mustra cu esaki por reduci gastonan anual pa detenido cu te 18%,

Importante tambe ta cu e analisis ta indica cu Aruba no mester un prizon hopi mas grandi, sino un miho prizon. E capacidad lo subi levemente, pero enfoke principal ta riba calidad eficiencia, sostenibilidad y rehabilitacion.

Segun e expertonan, e diseño nobo di e prizon lo tin un bida util di minimo 40 aña. Implementacion di esaki lo tin un duracion di tres aña. E fase di diseño y preparacion lo dura un aña, sigui pa e proceso di construccion di dos aña. Segun planificacion, e proyecto por wordo finalisa pa final di 2028.