Señora Cira Quandt a ricibi saludo special pa su 100 aña di edad, for di Su Mahestad

ORANJESTAD (AAN)-- E bishita di Su Mahestad Rey Willem Alexander a wordo ricibi cu hopi cariño y emocion pa pueblo di Aruba,

y por a mira cantidad di hende banda di Gabinete di Gobernador, pa mira e Rey di cerca, y saca potret di dje, ora el a sali for di Gabinete hunto cu Gobernador Alfonso Boekhoudt, y un delegacion cu a compañe.

Por a mira Su Mahestad sonriente, saludando e comunidad presente.

Un momento hopi emotibo ta ora Rey Willem Alexander a acerca señora Cira Quandt, ken tabata celebrando di cien aña di natalicio, y a ricibi un saludo y felicitacion special di su Mahestad y di Gobernador. Su Mahestad Rey Willem Alexander, cu un bunita gesto di a ofrece e dama un ramo di flor.  

El a bishita diferente otro lugar, dentro di e programa protocolar cu a wordo prepara pa e ocasion aki, cu Aruba a celebra su 50 aña di su Dia Nacional di Himno y Bandera, y a conmemora 40 aña di Status Aparte.