Loke tin aworaki ta e prome estudio haci pa determina con lo mester traha e prizon nobo

Minister Dowers a splica:

ORANJESTAD (AAN)-- Contestando un pregunta, durante e conferencia di prensa yama pa Minister di Husticia, mr. Arthur Dowers, tocante intencion di construi un prizon nobo pa Aruba, el a splica cu Gobierno anterior a haci un peticion na Hulanda, pa haya un suma di placa como cien y pico mil Euro, pa haci un analisis. Kiermen, loke a tuma lugar recientemente ta e analisis, e proyecto mes pa traha un prizon nobo no ta cla pa construi e prizon. Loke tin aworaki ta e prome estudio cu a wordo haci pa determina con lo mester construi e prizon.

Segun Minister Dowers, esaki a wordo haci cu placa di Aruba, y aworaki ta den fase cu mester yega, eigenlijk, na conclusion si ta bay hacie asina aki, y hopi importante tambe si gobierno por pag’e.

“Kiermen, esaki ta un proceso cu lo tuma basta largo. Un proceso cu a cuminza basta aña pasa, pero e fase inicial, kiermen e fase di trabao, a wordo haci e ultimo lunanan, y aworaki nos t’asina leu cu nos ta bay presente na nos coleganan, por ehemplo na Minister di Finanzas, pa busca e medionan financiero pa bisa si nos por implementa e proyecto aki, anto e ora ey nos ta bay den e siguiente fase.