Si ta bay tuma decisionnan drastico, laga esaki tin efecto positivo riba naturalesa

Tisa LaSorte, CEO di AHATa:

Cera lama un dia pa luna lo no yuda

ORANJESTAD (AAN): Proteccion di nos naturalesa ta un sentimento grandi cu ta biba den curason di cada ciudadano di nos pais. Nos beachnan, mondi, flora, fauna, tur ta forma parti di nos identidad y tambe di nos economia. Nos naturalesa ta nos rikesa, un base sigur di nos industria turistico. Proteha nos naturalesa ta un responsabilidad di cada ciudadano.

Señora Tisa LaSorte di Aruba Hotel & Tourism Association (AHATA), den un entrevista recien a menciona cu si di berdad kier proteha nos naturalesa, no por dijes cera nos lamanan of beachnan un dia pa luna pasobra esaki lo no yuda y lo no haci diferencia na e bida maritimo. “Esaki por ta algo simbolico berdad, pero cu ta perhudica hopi hende financieramente y lo no tin diferencia positivo pa nos naturalesa. Loke mester haci pa proteha e naturalesa ta baha e presion diariamente, un dia pa luna so lo no yuda”, el a expresa.

Señora LaSorte a enfatisa cu mester tuma desicionnan cu realmente ta haci diferencia pa nos naturalesa. Entre otro drecha Rwzi na Bubali Plas. El a duna di conoce cu Ahata tin hopi aña ta papia di e urgencia di e risico di contaminacion di lama, cu a worde indica den e raport di Carmabi. Esaki tin prioridad urgente.

Tambe el a menciona cu pa hopi aña ta discutiendo riba regulacion pa UTV-nan cu ta indica unda mag y unda no mag di core pa no kibra nos naturalesa. Cera beach y lama pa un dia mientras cu tin crusero y hopi turista, no ta yuda y sigur lo no domina e problema di UTV. Solucion lo ta pa pone regulacionnan di unda nan por core y stop di importa nan y caba cu nan poco poco.

Segun señora LaSorte, mester bin cu conbersacionnan mas elabora riba e tipo di turismo cu Aruba kier atrae, ki tipo di actividad kier ofrece turismo y con nos ta bay protaha nos naturalesa. “Haci algo cu ta impacta diariamente. Por dicidi tambe cu cada dia no kier mas di un of dos cruiseship bin  Aruba. Baha e cantidad di turista cu ta yega Aruba diariamente. Haci algo cu tin efecto real riba naturalesa y no algo simbolicamente solamente”, el a enfatisa.

El a agrega cu tur decision drastico cu tuma, lo afecta hende. Si regula uzo di UTV miho, e ta afecta operadornan di UTV. Si cera lama, e ta afecta piscadonan y esnan cu kier bay landra, e negoshinan di boto. “Den tur caso, tur decision cu un minister tuma, e ta bay afecta un hende. Pero loke ami ta bisa ta cu si bo ta bay afecta un hende financieramente, laga esaki tin su efecto positivo riba naturalesa. Y cera lama un dia pa luna, ta afecta hopi hende pero no tin efecto positivo riba naturalesa”, señora LaSorte a enfatisa.