PNHSA lo presenta peticion riba 17 di maart pa haci 1 di juli un dia di fiesta publico nacional na Aruba

ORANJESTAD (AAN): Plataforma Nacional Herencia di Sclavitud na Aruba (PNHSA) lo

presenta un peticion formal riba 17 di maart na 1:00 pm den Parlamento di Aruba na man di Presidente di Parlamento, Señor Marlon Sneek, hunto cu miembro di Parlamento Otami Thomasia. E peticion ta pidi pa 1 di juli wordo reconoci como un dia di fiesta publico nacional na Aruba.

E dia propone ta pa conmemora abolicion di esclavitud y pa duna reconocimento na e impacto di e Comercio Transatlantico di Sclavitud, cu tambe a tuma luga den historia di Aruba. Aunke hopi paisnan Caribense ta celebra 1 di juli, Aruba ainda no a formalisa e fecha aki como un dia di reflexion y herencia nacional.

PNHSA ta enfatisa cu reconoce 1 di juli como dia di fiesta publico ta un paso fundamental pa honra e resilencia, contribucion y herencia cultural di comunidad di descendiente Africano na Aruba. E dia aki lo yuda fortifica unidad nacional, promove consenshi historico y contribui na proceso di sanacion y husticia restorativo.

Despues di presenta e peticion na Parlamento, e mesun peticion lo wordo entrega tambe na Prome Minister di Aruba, Señor Mike Eman, pa enfatisa e importancia di un apoyo gubernamental amplio pa e iniciativa nacional aki.

PNHSA ta expresa su gratitud na Presidente Sneek y miembro di Parlamento Thomasia pa ricibi e peticion, y ta spera continua cu un dialogo constructivo cu Parlamento y Gobierno di Aruba.