Ioné Rodriguez, experto di UNOPS a splica:
*Cu condicionnan mas humano pa esnan priva di nan libertad
ORANJESTAD (AAN)-- Manera Minister di Husticia, mr. Arthur Dowers, a anuncia durante un encuentro cu sindicatonan siman pasa, dialuna 16 di maart e dignatario a elabora, den un conferencia di prensa na Bestuurskantoor, hunto cu expertonan, tocante e posibel prizon nobo, cu e tin den plan pa construccion.
E mandatario a haci un introduccion bisando cu e prizon existente ta den un condicion deplorabel, y esaki ta pone presion riba e trahadornan, pero tambe riba comunidad, pasobra no por detene tur e personanan cu mester wordo deteni na nos pais, y esaki ta trece presion den nos pueblo.
Un di e expertonan cu Minister Dowers a introduci den e conferencia di prensa aki, ta señor Ioné Rodriguez, ken a expresa na prome lugar cu e intencion ta pa e persona cu ta wordo deteni den KIA, ora e sali bolbe den e comunidad, totalmente rehabilita.
Rodriguez ta un specialista di UNOPS (Not. Red: Oficina di Nacionnan Uni pa Proyectonan di Desaroyo Sostenibel), y p’esey, nan a tene cuenta cu tur e standardnan y practicanan internacional, e recomendacionnan di CPT, e reglanan Mandela, Bangkok, pa e trato humano den e prizonnan.
“Na mesun momento nos a intenta no copia, sino adapta tur esaki na e contexto di Aruba, di manera cu nos lo crea standard y normanan specifico pa e contexto di Aruba, den total respet cu e practicanan internacional, y cu e recomendacionnan ricibi”, señor Rodriguez a señala.
A sigui un ronda di pregunta y contesta, tocante e desaroyo di e posibel construccion di un prizon nobo na Aruba.
Tocante e distribucion interno di e posibel instituto coreccional nobo pa Aruba, Rodriguez a contesta e prome pregunta di prensa, y bisa: “Nos a opta pa un distribucion yama Campus, cual concepto ta manera prizonnan chikito dentro di e prizon, unda por provee di espacio, servicio y ambiente cu ta totalmente independiente un di otro. Di e manera aki por conduci programanan tanto pa esnan priva di libertad di seguridad halto, como pa personanan vulnerabel, den e caso aki, hende muher, hobennan y adulto entre 18 y 21 aña, di manera cu por conduci mesun momento, diferente programa sin interferi un den otronan. Esaki ta parti di e decision cu a hiba nos un estilo di campus”, Ioné Rodriguez a señala.
