Director di FEPA, señor Marlon Vrolijk:
ORANJESTAD (AAN): Inteligencia Artificial (AI) a drenta hopi lihe den nos bida den e ultimo añanan, transformando e manera cu mundo ta traha, comunica y tuma decision. Na tur parti di mundo e tecnologia aki ta bira cada biaha mas comun. Aruba no ta keda atras, ya cu AI ta cuminsa tin un influencia creciente den negoshi, gobierno y bida diario.
Director di Fepa, señor Marlon Vrolijk, den un entrevista recien cu DIARIO, a remarca cu AI ya a drenta den varios sector di nos comunidad. Segun e, ta importante pa analisa cua trabou lo keda existi y cua lo cambia, pasobra hopi hende ya ta haci uzo di AI pa facilita cierto tarea. El a indica cu algun trabou lo por desaparece, mientras cu otro lo sigui existi, pero cu ta absolutamente necesario pa hende desaroya habilidadnan nobo pa por sigui traha hunto cu AI. Aunque cu algun trabou administrativo lo wordo parcialmente reemplasa pa AI, semper lo mester tin hende capacita pa supervisa y controla e sistemanan.
Un ehempel di un cambio tecnologico grandi ta e introduccion di computer. Den pasado, hopi hende tabata traha comfortabel cu typewriter. Ora computer a wordo introduci, hopi persona a sinti insiguridad, pasobra nan no tabata familiar cu e tecnologia nobo. Sinembargo, door di curso y entrenamento, hopi persona a logra siña habilidadnan nobo pa adapta y sigui desaroya den e sistema digital. Mescos manera, den varios sector awe, mashin y robot ta tuma luga di cierto trabou fisico. Pero pa esaki tambe, hende mester prepara nan mes cu conocemento y habilidad pa guia y controla e tecnologia.
Como instituto di enseñansa, Fepa ta nota un demanda creciente pa cursonan enfoca riba AI. Fundacion Fepa a plania pa introduci e cursonan di AI internamente prome, cu e meta di prepara nan propio personal. Despues di esaki, nan ta mira e posibilidad pa ofrece e cursonan tambe na comunidad. Segun señor Vrolijk, esaki ta un paso importante pa sigui avansa sin keda pega completamente den e manera tradicional di traha. AI, segun el a expresa, tin potencial pa beneficia tanto Fepa como henter Aruba.
