Wardacosta ta bay haya 3 Cutter nobo aki 3 aña

Pa reemplaza esnan existente

• Tambe lo haya tres speedboat di intercepcion rapido 

ORANJESTAD (AAN): E siman aki, Ministerio di Defensa Hulandes hunto cu e compania Damen Workboats a firma un contract pa construccion di tres barco patruyero di tamaño mediano pa Wardacosta di Caribe Hulandes. E contract a bira realidad, despues di a pasa den un proceso di Destaho Publico.  E asina yama “Cutternan” nobo lo bay reemplaza esnan existente patruyando den Caribe, esta Poema, Panter, y Jaguar, cualnan ya tin mas cu 25 aña den servicio. Ta anticipa cu e barconan di patruya nobo cuminza opera den Caribe Hulandes na comienso di aña 2029.

   Defensa Hulandes mes ta buscando e Cutternan aki pa Wardacosta cu ta patruya den Caribe Hulandes, como cu nan ta responsabel pa e.o. e vigilancia maritimo, search and rescue, vigilancia di frontera, paruyahe, y yuda mantene ordo y ley.

   Cutter mas grandi: E cutternan existente a cuminza nabega rond di e islanan di Caribe Hulandes na final di decada di 1990.  Nan ta di e categoria Damen Stan Patrol 4100 y pa hopi aña a funciona optimal y no a laga Wardacosta na caya.  Pero toch debi na nan edad, e mantenimento y gasto ta aumentando.  Pesey awor Hulanda a opta pa busca Cutternan nobo.

   Esakinan ta e modelo avanza Stan Patrol 5009, y nan ta como 50 meter largo, loke ta haci nan mas grandi cu esnan existente.  Pa Defenda Hulandes, esaki ta importante debi na e condicionnan di lama den Caribe hopi biaha ta turbulento.  Fuera di esey, e Cutternan nobo tambe lo ta ekipa cu sensornan moderno, manera radar avansa y camaranan infrared. Esaki ta permiti e tripulacion mantene un vigilancia efectivo hasta anochi of den mal visibilidad. Esaki ta aumenta e efectividad operacional di Wardacosta di Caribe Hulandes, y ta fortalece su habilidad pa ehecuta su tareanan.

   Version nobo di speedboat di intercepcion rapido: Ademas di e Cutternan, e compania Damen Shipyards lo suministra tambe cuater speedboat di intercepcion rapido. Cada Cutter lo tin uno abordo. Nan ta destina pa intercepta botonan e.o. Go-fast di contrabanda rapido. E speedboatnan chikito ey hopi biaha ta wordo uza den transporte di droga den Caribe. Un interceptor adicional tambe lo ta disponibel pa rotacion di entrenamento y mantenimento. E interceptornan nobo ta mas grandi cu e modelonan actual, loke ta permiti nan mantene miho velocidad hasta den olanan mas halto.

   Cu yegada di e Cutter y interceptornan nobo, Wardacosta lo tin ekiponan moderno cu ta miho adapta na su tareanan actual. E barconan asina ta duna un contribucion importante na siguridad y mantenimento di ley den e region di Caribe Hulandes.