Semifinal Torneo Himno y Bandera diadomingo awo na Club Aruba Juniors

ORANJESTAD (AAN): E Torneo Himno y Bandera organisa na club Aruba juniors ta continua diadomingo awo 15 di maart 2026 cu e semifinalnan pa saca afo ken lo hunga e finalnan dia 18 di maart 2026.

E prome wega diadomingo awo ta cuminsa 9:30 y lo bay entre Tigers y Astros. Pa 11:00 lo tin e di dos wega cu lo ta e prome semifinal unda cu Slugger (3-0) lo enfrenta Surprise (2-1). Ta traha aki di dos team fuerte cu hungadonan di caliber halto. 12:30 pm ta sigui e di dos semifinal entre Deco’s di Mario Croes cu tin e rumannan Thiel den line-up contra e team di cas Aruba Juniors. Deco’s ta un ekipo solido pero mester para fuerte pasobra Aruba Juniors a gana 4 torneo e aña cu a pasa. Jani’s cu Boomerang ta topa otro pa 2or.

E ultimo wega c uta riba schedule pa 4or pm lo ta den Liga 50 unda cu Old Timers ta topa Aruba Juniors. Manera custumber e bar y cushina di Irma lo ta bon surti. Tambe DJ Navio lo pone música varia di Latino te rock & Roll.

E torneo ta clausura dia 18 di maart 2026, unda e finalnan lo wordo hunga. Riba 18 di maart lo celebra Dia di Himno y Bandera na grandi cu homenahe na dos deportista destaca, cushina di seafood y e banda Dushi Vibezz.