Axcel Figaroa, lider di TOPA:
ORANJESTAD (AAN) Segun e lider sindical di TOPA, Axcel Figaroa, Aruba pa hopi aña ta mara na turismo y e suerte ta cu e “bubble” ey no a rementa ainda.
“Ainda nos economia ta depende di turismo. Turismo ta bayendo bon y e ta creciendo, pero e peligro di tene na un solo pilar economico ta cu cualkier movecion internacional, por hinca bo den un situacion di hopi problema, y no mester ta ni internacional”, Figaroa a subraya.
El a trece acerca e caso di e mucha muher Mericano cu a perde na Aruba, con turismo a sufri. No pa algo internacional, sino pa algo cu a pasa localmente. “Corda algo internacional, un pandemia, un guera, of cualkier tipo di movecion internacional, por trece consecuencianan hopi grandi pa Aruba, door cu cualkier bahada di turismo por afecta nos tremendamente. Nos tin cu explora otro posibilidadnan.
Cu otro posibilidadnan por reemplaza turismo? Dificilmente, pasobra nos ta enfoca asina hopi riba turismo, cu e lo tarda generacionnan, prome cu nos yega na otro pilar economico cu ta comparable cu turismo, pero hecho ta si, cu nos mester diversifica, pasobra cu nos ta depende di un solo pilar economico, ta keda un peliger” Axcel Figaroa, lider sindical di TOPA a remarca.
