Presupuesto DOW 2026 mester marca un cambio pa mantencion preventivo di infrastructura

Parlamentario di AVP, John Hart:

ORANJESTAD (AAN): Parlamentario John Hart (AVP) a indica cu e presupuesto pa aña 2026 di Departamento di Obra Publico (DOW) lo bin pronto dilanti di Parlamento di Aruba pa discusion. Segun Hart, e momento aki ta importante pa evalua e maneho di infrastructura den e ultimo añanan y pa determina con e pais por tuma un direccion diferente pa futuro.

Parlamentario Hart a mustra su preocupacion cu e maneho di infrastructura den e ultimo añanan. Segun e, ta cla cu rond di Aruba tin un falta di atencion riba diferente areanan esencial. Entre otro, el a menciona mantencion insuficiente di careteranan, falta di iluminacion den diferente barionan, bermnan di caminda y trottoirnan cu ta deteriora, y tambe falta di sleeping police den diferente caya, situacion cu ta crea mas insiguridad den trafico. Ademas, Hart a mustra preocupacion riba estado di diferente edificio di gobierno y scolnan cu tin atraso serio den mantencion.

Segun Hart, DOW y gobierno tin un rol central den atende e problematica aki, pero Parlamento tambe tin un responsabilidad importante ora trata e presupuesto pa sigura cu ta uza e recursonan di forma efectivo.

Parlamentario Hart a referi tambe na e rapport di Jeugdmonitor 2024, presenta aña pasa den Parlamento. E estudio aki ta ofrece informacion valioso riba e situacion social di Aruba. Entre e punto principalnan, e rapport ta mustra cu pobresa na Aruba no ta un incidente aisla, sino un problema mas profundo y sistematico. Segun e estudio, deterioro di barionan ta contribui na desigualdad social, cu consecuencianan directo pa siguridad, enseñansa y salud mental di nos hubentud.

Hart a enfatisa cu deterioro fisico y social den barionan ta reforza un sentimento di pobresa y tin impacto directo riba calidad di bida di famianan. “Realidad ta cu den e ultimo añanan, y specialmente den e ultimo lunanan, nos por conclui cu hopi barionan a keda atras. Aunke tabatin surplus fiscal, e deterioro di infrastructura ta visibel. Barionan ta mas deteriora cu nunca,” Hart a declara. Segun dje, e situacion aki ta resultado di añanan di falta di asumi responsabilidad riba asuntonan structural.

Pesey, Hart ta mira e presupuesto di DOW no solamente como un documento di infrastructura y mantencion, sino tambe como un instrumento importante pa contribui na combati pobresa y mehora calidad di bida den nos barionan.

Den e contexto aki, parlamentario Hart ta enfatisa cu e presupuesto 2026 mester refleha un cambio claro den maneho: di un modelo reactivo pa un modelo preventivo. “No nos por sigui warda te ora cos kibra pa despues bay drecha. Mester tin planificacion y inversion structural pa mantene nos infrastructura,” Hart a indica.

Segun Hart, e presupuesto mester inclui suficiente recurso pa sigura cu barionan tin miho caretera, asfalt, sleeping police y infrastructura adecua pa aumenta siguridad di trafico. E tambe a subraya cu planificacion a largo plazo ta esencial pa logra resultado concreto.

Durante e reunion publico riba e presupuesto di DOW 2026, parlamentario Hart lo sigui enfatisa e importancia di planificacion structural, pa asina pueblo di Aruba por mira resultado mas concreto y sostenibel den mehoracion di infrastructura y calidad di bida.