Parlamentario Xiomara Maduro
ORANJESTAD (AAN): Parlamentario Xiomara Maduro, como ex-Minister di Finansa, ta enfatisa cu no tin ningun motibo pa Aruba perde mas autonomia financiero pa medio di introduccion di Rijkswet HOFA.
Aruba ya caba tin supervision financiero desde aña 2015. E sistema aki a wordo establece pa fortalece disciplina fiscal y supervision riba e finansa publico di Aruba. Den e ultimo añanan, e mecanismonan di control existente a mustra cu nan ta funciona y cu Aruba por maneha su finansa publico cu responsabilidad.
“Nos mester pone e discusion den e contexto corecto,” Maduro a declara. “Aruba ya ta bou di supervision financiero. E pregunta real no ta si supervision ta necesario, sino si nos mester cambia e sistema actual pa duna Hulanda mas influencia riba decisionnan financiero di Aruba.”
Maduro ta señala cu e resultado financiero reciente ta mustra progreso cla: disciplina fiscal a wordo fortalece, e debe publico ta wordo maneha cu responsabilidad y tin mas atencion pa crea espacio fiscal pa inversion den economia y bienestar social.
Segun e parlamentario, introduci Rijkswet HOFA no ta necesario si e sistema actual ya ta produci resultado. Al contrario, un cambio di e naturalesa aki por resulta den un sructura unda e Parlamento di Hulanda por haya mas influencia riba e finansa publico di Aruba, algo cu por afecta e autonomia di Parlamento di Aruba.
“Si un sistema ta funciona, no tin motibo pa reemplasa esaki cu un modelo cu ta move mas poder for di Aruba. No tin motibo pa perde mas autonomia,” Maduro ta enfatisa.
Maduro ta subraya cu autonomia constitucional di Aruba, manera stipula den e Statuut pa e Reino di Hulanda, mester wordo respeta. Cada pais den Reino tin responsabilidad primario pa su propio asunto interno, incluyendo su maneho financiero.
Parlamentario Maduro ta haci un yamada pa un discusion serio y balansa riba e futuro di supervision financiero, cu e interes di Aruba y respet pa su autonomia institucional den centro di e debate.
