Exitoso Politiek Café organisa pa Gabinete di Aruba

ORANJESTAD/Den Haag (AAN): Gabinete di Minister Plenipotenciario di Aruba a organisa na De Haagsche Bier Kluis na Den Haag un “Politiek Café” den cuadro di e Gemeenteraadsverkiezingen di dia 18 di maart benidero,

Pa e evento aki a participa dos candidato Arubiano, cu ta Vanessa Bruin pa Leefbaar Rotterdam y Zane de Ponte pa D66 Den Haag. Tambe e edicion di e “Politiek Café” aki a conta cu dos orador no politico cu ta James van der Linde riba e tereno di enseñansa y Lionel Martijn, presidente di OCAN. 

Despues cu e moderador di e Politiek Café Sidney Kock a yama tur presente bon bini, Hefe di e departamento Huridico di Gabinete di Aruba mr. Shandra John a hiba palabra unda ela bisa cu pa Gabinete di Aruba ta importante pa duna informacion na e comunidad Arubiano na Hulanda riba e importancia y derecho pa vota. ‘Esaki ta e razon pakico a organisa e Politiek Café aki y e biaha aki rond de Gemeenteraadsverkiezingen.

Specialmente cu tin Arubiano cu ta participa na e eleccion aki y cu nos por tende mas kico e gemeenteraadnan ta haci,’ asina Shandra John a bisa. Finalmente señora John a gradici e team di Gabinete di Aruba pa e organisacion di e evento aki. 

E programa a sigi unda Sidney Kock a hiba combersacion cu e oradornan. Vanessa a papia riba con ela drenta den politica na Rotterdam; kico su trabao como “gemeenteraadslid” ta encera. Zane a bisa cu di hoben ela drenta den politica via Jonge Democraten, cu ta e ola pa politiconan hoben di D66. Den e combersacion cu James van der Linde como didactica ela

papia riba democracia, implicacion y tin un bos den bo cercania directo; como ehempel Enseñansa Superior. Presidente di OCAN Lionel Martijn a splica kico OCAN ta haci pa e comunidad Caribense y tambe e nivel di participacion di e comunidad Caribense na eleccionnan compara cu e otro gruponan etnico na Hulanda. 

Despues tabata tin oportunidad pa pregunta y hopi persona a haci uso di e oportunidad aki pa lansa nan preguntanan specialmente na e dos politiconan den e sala.

Gabinete di Aruba por mira atras riba un evento sumamente exitoso. Un grabacion di henter e evento ta bisto riba e pagina di Facebook di Gabinete di Aruba. 

E potretnan ta cortesia di Gabinete di Aruba.