Cobra hende pa haci cita ta un tipo di estafa y di corupcion

Directora di Censo, señora Sharin Luydens:

Ta conseha tur hende haci cita nan mes via website di Censo 

ORANJESTAD (AAN): Ya pa basta aña caba, Registro Civil y Censo Aruba ta brinda servicio pa haci cita via nan plataforma online, y a facilita e maneho y tambe a reduci e tempo di warda pa haya turno na Censo. Tur ciudadano por haci esaki nan mes via e website di Censo. Personanan riba 65 aña, durante e temporada di drukte aki, ta ser pidi tambe pa haci nan cita online, sea nan mes of cu ayudo di un familiar of amistad. Stranheronan por scoge nan idioma ora di yena e rekisitonan cu ta ser pidi.

   Directora di Censo, señora Sharin Luydens, den un entrevista recien a duna di conoce cu actualmente tin un tendencia na unda cu tin personanan ta cobra pa haci peticion pa cita pa otro hende. Señora Luydens a remarca cu e ta condena esaki yamando e hecho aki un tipo di estafa y un incentivo pa promove corupcion.

   El a menciona cu pa evita e fluho di e conducta ilicito aki, Censo a cambia e sistema pa haci cita cu e fin pa hacie mas dificil pa hende comete e actonan aki. Entre otro e sistema ta blokia email cu ta repitivo y cu ta mustra sospechoso door uza e adres ey constantemente pa haci cita. Pero, toch e hendenan aki ta keda habri emailnan nobo, pa gana placa riba personanan cu no sa of no por haci cita nan mes, specialmente durante e problema temporal cu tin actualmente.

   Señora Luydens a remarca cu e website ta facil pa uza y yena informacion y tin opcion pa varios idioma. Tambe stranheronan por haci uzo di google translate ora di yena nan peticion.

  “Mi ta conseha tur stranhero pa purba haci nan cita nan mes, y no paga niun hende pa haci esaki. Pasobra haciendo asina, no ta contribui na nada constructivo pero si, na mi parecer, nan ta strobando e proceso”, señora Luydens a expresa.

  El a enfatisa pa tur stranhero haci nan cita ora ora cu nan permiso ta cla. Pa asina no tin mester di blokia citanan of keda sin bay e cita, strobando asina otro persona haya cita mas lihe.