Si no bin solucion di parti di Gobierno e ora Sindicato SADA lo por keda sin directiva

President Edward Maduro di SADA

ORANJESTAD (AAN) – E siman aki, Sindicato SADA a reuni cu su miembronan pa trata diferente preocupacion cu ta afecta e funcionamiento debido di e sindicato. Presidente di SADA, señor Edward Maduro, a splica cu desde 2017 e sindicato ta enfrenta obstaculonan bou di e maneho di director di Aduana, Roderick Croes.

   Segun Maduro, e situacion aki a wordo señala na gobierno ya for di 2018 na e minister di Finanzas e tempo ey, Xiomara Maduro. E sindicato a spera cu gobierno lo a busca un solucion pa garantisa cu sindicato por opera debidamente. Sinembargo esaki no tabata e caso. El a enfatisa cu e derecho pa sindicato funciona libremente ta protehi tanto den constitucion como den tratadonan internacional.

   Durante e periodo di formacion di e gobierno actual na 2025, SADA a pone e preocupacion aki na mesa di e formadornan, Prome Minister Mike Eman y Minister Gerlien Croes. Den e reunionnan, sindicato a splica e reto cu nan ta confronta pa representa su miembronan debidamente. Segun Maduro, a bin promesa cu lo presenta un solucion formal y duidelijk pa tanto e maneho di Douane como pa sindicato, pero te dia di awe esaki no a concretisa.

   Segun e presidente di SADA, e situacion a bira mas serio ora cu aña pasa un miembro di directiva a ricibi un accion disciplinario pa asisti un reunion cu Prome Minister. Maduro a indica cu un reaccion asina no ta na su luga, considerando cu ta traha den directiva di un sindicato boluntariamente.

   E situacion aki, segun e, a causa cu algun miembro di directiva a entrega retiro. Nan a indica cu mientras no tin un solucion cla di parti di Gobierno, y e ley y maneho interno ta sigui stroba e trabao sindical, no tin mucho sentido pa continua cu e directiva actual.

   Maduro a splica cu trahadonan di Aduana no ta wordo paga pa forma parti di un directiva sindical. Ta un compromiso boluntario cu nan ta asumi pa defende interes di nan coleganan. Sinembargo, e situacion actual ta pone e directiva den un posicion precario.

   Si no tin solucion pronto, e chens ta grandi cu e directiva actual lo entrega retiro completamente. Y si durante e reunion general di juni no tin candidato pa forma un directiva nobo, ta posibel cu for di juli Sindicato SADA lo keda sin directiva.

   Maduro a aclara cu esaki no ta e deseo di e directiva. Segun e, un sindicato ta un instrumento importante tanto pa trahadonan como pa e comunidad en general.

   SADA a mantene comunicacion cu Gobierno y tambe cu otro sindicatonan local, cu segun Maduro tambe ta desaproba e accion disciplinario contra e miembro di directiva. Ademas, e sindicato a haya conseho di organizacionnan sindical tanto local como na Curaçao pa considera hiba e asunto mas leu, incluso na nivel internacional, en bes di solamente presenta un keho na Gobierno.