Bulgaro cu a hit ATM mashin pa mas di 22 mil Florin condena na 8 luna di prizon

Hues a confirma exigencia di Fiscal

ORANJESTAD (AAN): E homber Bulgaro Z.V.D. (45) ayera a scucha Hues bisa cu Z.V.D. ta culpabel di a skim carchinan di credito y a hit ATM mashin di Banco di Caribe. Hues a bisa cu e ta haya e castigo exigi pa Fiscal na su lugar y a condena Z.V.D. na 8 luna di prizon.

   Tratamento di e caso a tuma lugar dia 13 Februari 2026, caminda e acusacion di Fiscal ta mustra cu ta e hombernan Z.V.D.  y J.B. di Bulgaria a falsifica credit cards y horta ATM mashin di Banco di Caribe. Ta asina cu J.B. a wordo saca for di Aruba.

   Security Cam a capta: Hues a mustra cu Polis a reconoce J.B. na ATM mashin via camera di seguridad.

Hues a bisa cu Master Card a manda Banco de Caribe un lista di e transaccionnan cu a wordo haci cu e carchi. 115 transaccion a keda haci cu ta 80 mil Florin.

   Fiscal a exigi 8 luna di prizon: Fiscal a bisa cu door di e situacion di skimming, hopi banco rond mundo a modifica e ATM mashin. Na Aruba esnan di Banco de Caribe no ta modifica. Riba imagen di video di seguridad a mira Z.V.D., J.B. y K. na diferente di e ATM mashin di Banco de Caribe na Aruba. Z.V.D. ta desmenti pero Fiscal ta haya cu tin imagennan di video caminda ta mir’e ta saca placa for di ATM mashinnan. Fiscal ta considera esaki un organizacion criminal internacional cu ta planea pa copia credit cards di hende y asina traha credit card falso.

   Na opinion di Fiscal, Z.V.D. y K. a bin Aruba cu e intension pa saca placanan. E tabata envolvi den 11 transaccion caminda a haci mal uso di e fayo den e systema di ATM mashin. Fiscal a exigi 8 luna di prizon pa Z.V.D.

   Sentencia: Riba Diabierna mainta Hues a bisa cu Master Card a notifica Banco de Caribe cu tin clientenan a keha cu a kita placanan for di nan na Aruba, siendo cu nan no ta na Aruba. Hues a reacciona riba defensa cu a bisa cu e cameranan di seguridad a tuma imagennan cu ta ilegal. Hues a bisa cu e no ta haya cu e imagennan no por wordo usa como prueba. Hues a rechaza e peticion di abogado mr. Emerencia pa no usa e imegennan como prueba.

   Hues a bisa cu via Immigracion a saca afor cu Z.V.D. y J.B. a bin Aruba na November 2024. Hues ta haya cu Z.V.D. y J.B. a haci transaccion via ATM mashin. Nan a skim carchinan intencional. Hues ta haya cu Z.V.D. ta complice di a horta 22.142 Florin for di e ATM mashinnan.

   El a bisa cu Fiscal a exigi 8 luna di prizon. Hues ta haya cu tipo di delitonan asina ta causa perdida financiero pa companianan financiero. Tambe cu e ta causa daño serca usadornan di ATM mashin cu ta confia den e sistema. Hues ta confirma exigencia di Fiscal.

   Hues a condena Z.V.D. na 8 luna di prizon y su smartphone ta keda confisca. Hues a bisa cu por a mira via camera cu Z.V.D. tabata usa su smartphone pa haya sa pin. Esey ta haci cu e smartphone mester keda confisca