Asumi e rol di mama y tata pareu no ta algo facil pa hopi hende muhe

Parlamentario Wever-Croes:

ORANJESTAD (AAN)-- “Un di e pesonan grandi cu hopi biaha ta bin riba hende muhe, ta ser mama y tata pareu, loke no ta algo facil”, asina Parlamentario señora Evelyn Wever-Croes a expresa den entrevista cu DIARIO.

   “Naturaleza ta bisa cu un tata mester ta den bida di su yiunan. E mamanan cu ta haci esaki ta mamanan cu ta hacie fenomenalmente, mi tin un respet grandi pa nan. Mi ta mira mas y mas cu den leynan, legislacion y maneho di gobierno, tin mas sosten den esey tambe. Nos, di parti di Parlamento, ta purba di enfoca riba esakinan y pone mas atencion riba dje. No solamente e mamanan cu nan so tin cu lanta nan yiunan, pero tambe tin un tendencia mas grandi den abuso fisico, verbal y sexual riba hende muhe den edad hopi jong”, Parlamentario Wever-Croes a señala.

   El a referi na un combersacion cu e tabata tin recientemente cu un grupo di hoben, mucha muhe, el a keda sorprendi di con normal nan ta haya cu e guy nan tin, nan pareha, por dal nan; agredi nan fisicamente. “E no ta normal pa bo, asina jong ya caba ta cuminza pensa cu e ta normal. E no ta!  

   Diferente instancia y institutonan na Aruba ta traha pa concientizacion y aki ta na unda nos kier wak mas fondonan aloca, pa esnan cu sa di e materia bay scolnan, papia cu nos hobennan tambe y mustra nan con bunita un relacion por ta sin cu bo tin agresion den dje” Parlamentario Evelyn Wever-Croes a declara.