Almacena petroleo ta un bon oportunidad pa otro pilar economico pa Aruba

Edsel Figaroa, lider sindical di TOPA:

*Aruba tin 17 tanki di cual 7 ta funciona perfectamente 

ORANJESTAD (AAN)-- Sindicato TOPA, y otro sindicatonan a wordo invita door di e fraccion di Partido Movecion Electoral di Pueblo (MEP), pa un encuentro riba dia 14 di Februari, pero tres so di nan tabata presente e dia ey. Asina presidente di TOPA, señor Edsel Figaroa, a duna di conoce den entrevista cu Matutino DIARIO. E tema tabata rond di e procesamento di crudo cu ta tumando lugar na Venezuela, den man di companianan Mericano, y con esaki por beneficia Aruba.

“Pa nos parti, nan a duna nos informacion, por ehemplo, cu despues di 3 di Januari e oportunidad a presenta atrobe, na unda cu Aruba por forma parti di un otro desaroyo.

“Nos sa cu aworaki, Aruba ta basa riba un pilar economico so, y esey ta turismo. E ta un pilar cu ta stabil, pero nos tur sa durante Covid-19, kico por a pasa, el a destabiliza. Esey por pasa atrobe, e ta fragil. E ta fuerte pero e ta fragil si algo sosode. Nos tur sa cu Aruba mester di un segundo pilar. Anto, esaki ta e oportunidad cu nos por haya y cu sigur nos por haci uso di dje, ta almacena e petroleo, por lo pronto, te ora dicidi cu ta bay proces’e of ta mand’e pa un otro pais, of dun e otro destinacion”, señor Figaroa a señala.

Edsel Figaroa a comenta cu e tin entendi cu tin 17 tanki na Aruba, di cual siete ta funciona perfectamente y diez tin cu wordo revisa of drecha.

“Y e inversion cu mester tuma lugar den dje ta minimo, compara cu e probecho cu lo por saca for dje”, Figaroa a bisa y acentua cu TOPA ta apoya tur iniciativa di cual partido cu e ta. “E por ta gel, biña, rose, nos ta apoya tur iniciativa unda bo ta crea empleo pa nos trahadornan akinan, nos ta pro esey”, e lider sindical a expresa.

Durante e reunion nan a sinta discuti varios punto, y a bin dilanti y hasta el a compronde cu tin posibilidadnan cu bo por lanta e compania bek. “E parti di procesa e petroleo pero na un otro forma. Bo no ta bay drecha esey bek, nos sa cu esey ta costa hopi placa pa por dreche y aworaki nos no ta den e situacion di por hacie. Pero mi a compronde cu tin sistemanan ‘affordable’ cu bo por pone funciona”, señor Figaroa a señala. “Señor de Sousa a duna un bon splicacion riba dje, y mi ta haya cu e ta un bon persona pa nos haya mas informacion riba dje” el a agrega.