John Hart a habri debate di vivienda cu gobierno den Parlamento

ORANJESTAD (AAN): Situacion di vivienda na Aruba a bira un di e preocupacionnan mas grandi den nos comunidad.

Prijs di cas y huur ta sigui subi, disponibilidad ta limita, y hopi famia (specialmente hoben profesional, famia hoben y cu entrada minimo) ta enfrenta dificultad serio pa haya un cas pagabel. E presion riba mercado a crea insiguridad social, retraso den formacion di famia y te hasta exodo di nos hendenan.

   Den e contexto aki, Parlamentario di AVP, John Hart, a haci uzo di su derecho pa solicita formalmente un sesion di pregunta y pidi Minister di Infrastructura, Sr. drs. R. Herde, pa bin Parlamento di Aruba y comparti informacion riba e situacion di vivienda na Aruba. Dicho encuentro a tuma luga dialuna mainta.

Segun Hart, pa hopi ciudadano yega na un cas propio a bira algo casi impagabel. E ultimo añanan a mustra un stagnacion cla den mercado di vivienda, algo cu mester ser discuti habri y cu responsabilidad. “Vragenrecht ta un instrumento pa controla gobierno. Nos como Parlamento tin e deber di haci pregunta y exigi claridad ora un sector asina esencial manera vivienda ta para,” Hart a declara.

   Den su peticion, Hart a pidi clarificacion riba e motibonan principal tras di e stagnacion den mercado di vivienda y si tin factor structural of politico cu a contribui na e situacion actual. Ademas, el a busca un actualizacion concreto riba kico gobierno lo haci pa stimula construccion y aumenta disponibilidad di cas pa huur, cu medidanan specifico y plasonan realista.

   Tambe a plantea si minister ta evalua un posibel aumento di huursubsidie pa hogarnan cu ta depende di un entrada minimo, considerando e presion creciente riba famianan vulnerabel. Hart a pidi igualmente clarificacion riba opcionnan di financiamento innovador, incluyendo e posibilidad pa activa recurso manera APFA pa yuda financia FCCA cu construccion di vivienda social y pone e mecanismonan financiero traha debidamente.

   Finalmente, el a solicita Minister Herde pa comparti su vision concreto riba regulacion di short term vacation rental y con e actividad aki ta impacta disponibilidad di vivienda pa residente local.

Hart a enfatisa cu situacion di vivienda ta exigi decisionnan fuerte. “No por sigui cu estudio tras estudio mientras famianan ta sufri. Ta tempo pa solucion. Ta tempo pa liderazgo,” el a expresa.

   E parlamentario a indica di ta contento cu a habri e debate den Parlamento riba un tema tan critico y a pidi pa un reunion publico pa continua cu e debate hunto cu sector, experto y ciudadano. “E tema aki no por keda limita na sala di Parlamento. Nos mester scucha pueblo y traha hunto na solucionnan realista.”

AVP ta mantene cu mercado di vivienda mester un direccion cla, mas coordinacion interinstitucional y boluntad politico pa implementa medidanan eficaz. “Vivienda no ta un luho, ta un derecho basico. Si nos kier un pais cu stabilidad social y economico, nos mester cuminsa aki,” John Hart a conclui.