Auto a dal peaton crusando caya den marduga

Accident Diadomingo na Tanki Flip

ORANJESTAD (AAN): Banda di 3’or y pico di Diadomingo marduga, Central di Polis a ricibi notificacion cu auto a dal un hende e momento ey.

   E informe ta indica cu riba e caminda di Ponton pa Noord, un poco panort di rotonde di Tanki Flip, un auto a dal un peaton masculino.

   Esnan cu a yama Polis a splica cu nan ta testigo con auto a dal e peaton crusando caya, y el a keda eybao benta.  Nan a stop y pa evita mas tragedia, nan a lastra e homber for di riba asfalt y a pone na banda riba acera, y warda asina riba Polis y Ambulance.

   Mesora patruya di Polis a ser manda, y a pone Centro di Alarma na altura pa dirigi Ambulance.

   E prome unidad di Polis a yega y topa cu e peaton masculino abao riba acera, y e ta herida.  Esnan eynan a splica agentenan, cu e peaton a bay cruza e caminda y net na e momento ey tabatin un auto sedan Kia Cerato direccion panort y cu velocidad halto.  E auto mes a logra brake y stop un poco mas panort unda e accident a sosode.

   Ambulance a yega y mesora Paramediconan a haci un triage pa mira kico urgente tin riba e pashent, y a nota cu posiblemente el a sufri di un fractura complica na su pia.  Mientras tanto, Polis a pidi pa Specialista di Trafico yega, y tambe team forensico di BFTO pa documenta e accident y tuma midimento.

    Paramediconan a stabiliza e pashent, a pone spalk na su pia, y asina a pone den brancard y a sali rumbo cu ne pa Servicio di Emergencia na Hospital.