Razzia na cas na Kamay a produci hopi droga y placa cash

Un persona deteni

• Unit Narcotica ta sigui gara grandinan 

ORANJESTAD (AAN): E trabao di autoridadnan hudicial di Unit Narcotica di Cuerpo Policial di Aruba, ta sigui score grandemente.  Basa riba nan experticio, nan intuicion, sosteni pa datonan, tips, y di oficialnan bakia den nan trabao, nan ta logra traha cautelosamente riba tur detaye, y ora cu nan ta yegando na partinan culminante, nan ta ricibi sosten di Ministerio Publico pa tene entrada hudicial.

   Siman pasa a dicidi na uni diferente unidad di sosten, y den oranan di atardi nan a bay tene un razzia inespera na un cas den bario di Kamay na Noord.

   Tur nan trabao duro, y e investigacion conciso, a yuda cu nan a yega eynan y a canta “bingo” pa loke nan a topa cu ne.

   Den e accion di sorpresa, a bin topa cu gran cantidad di placa cash, tanto na Florin y Dollars, y tambe monton di droga.  Ta bisto cu e droga aki no ta pa uzo personal, sino pa distribucion y of actua eynan como centro di distribucion.

   Aki a detene un homber adulto mayor tambe, esta un persona di 62 aña di edad naci na Aruba.

   Nan a listra cada centimeter di e cas y pafo riba e tereno pa check kico mas por haya.  Pa e razzia sorpresivo aki a haci uzo di diferente departamento di Cuerpo Policial, entre otro Flex Team, Polis uniforma,  K-9 Unit, team forensico di BFTO pa documenta tur cos, y RRT.

   Vocero di Polis a confirma na DIARIO, cu e razzia aki tabatin di haber cu bendemento di droga for di e cas mes.

   Cuerpo Policial ta keda haci un suplica na comunidad cu sa algo of a wak algo pa yama e Tipline di Polis cu ta 111-41.  Haciendo esaki, bo ta haci bo bario bira mas safe, y corda cu Polis ta garantiza cu bo ta keda anonimo.