Cu 55 persona positivo abordo e crusero Odyssey of the Seas no a bishita Aruba ni Curaçao

Pasaheronan cu Covid-19... --- ORANJESTAD (AAN): E barco di Odyssey of the Seas cu Diasabra 18 di December 2021 a sali for di Port Everglades na Fort Lauderdale pa un viahe di 8 anochi,

a haci un cambio grandi riba su itinerario!  Esey a socede despues cu a descubri cu abordo di e barco tin 55 pasahero y tripulante cu a sali positivo pa test di Covid-19.

   Diadomingo nan a pasa bishita e isla priva di Coco Cay na Bahamas.  Riba Dialuna y Diamars net ora cu e tabata dirigiendo su mes rumbo pa Curacao, a bin nota cu e cantidad di hende cu Covid-19 abordo ta creciendo.

   Decision a cay y a dicidi pa no bishita ni Curacao riba Diaranson 22 di December, y tampoco a bishita Aruba riba Diahuebs 23 di December.

   Royal Caribbean International a confirma cu tin un brote nobo di Coronavirus riba e barco Odyssey of the Seas cu aworaki ta riba su Christmas Cruise.  Nan tin abordo 55 pasahero y tripulante cu a haya e virus.

   Nan vocero Lyan Sierra-Caro a bisa cu e decision pa no bishita Curacao y Aruba a ser tuma hunto cu e autoridadnan di salud di e islanan aki, y pa precaucion debi na e tendencia actual di contagio rapido, pa proteha e islanan, y tambe pensando riba e tripulacion y pasaheronan riba e barco.

   E barco mes lo drenta bek Port Everglades riba Diadomingo 26 di December 2021 pa 6:15 am na Fort Lauderdale.

   “E 55 casonan entre pasahero y tripulantenan ta representa 1.1% di e casonan.  E crusero a start e viahe cu 95% di e comunidad abordo completamente vacuna,” nan a declara.

   Casi tur e 55 casonan aki ta djis tin sintoma leve y algun ta asintomatico.

   Royal Caribbean ta exigi prueba di vacunacion di tur pasahero riba di 12 aña, y prueba negativo di test di Covid-19 prome cu viahe, pa tur pasahero di 2 aña bay ariba.  Tripulantenan ta pasa den test semanal di Covid-19.

   E barco Odyssey of the Seas cu ta un barco nobo di 2021, ta esun di mas nobo y moderno di Royal Caribbean International y apenas na November a wordo bautisa na Fort Lauderdale.

   A ser bisa, cu apenas 1 dia despues cu el a sali di Fort Lauderdale riba Diasabra pasa, cu e mester a regresa y baha un pasahero na waf di Florida, prome cu el a sigui.  Ta parce cu e persona ey tambe a bira malo di Covid-19.

   Royal Caribbean a bisa cu nan ta sigui monitor salud di tur otronan cu ta riba e viahe aki.  Nan a haci contact-tracing y a identifica esnan cu tabata cerca di e demas pasaheronan, usando imagen di video.  Nan a wordo poni den cuarentena y ta wordo vigila 24 ora pa dia.

    E compania a bisa cu nan standard di limpieza y desinfecta areanan publico ta hopi mihor cu otro, y tambe na tin atencion medico experto amplia, cu tin filternan potente pa filtra aire y haci esaki 100% fresco, y cu ta obligatorio pa cana tur caminda cu tapaboca.

   Awor riba cruseronan di Royal Caribbean, bo tin di usa esaki na tur lugar paden, y bo por kita e tapaboca solamente ora di come of bebe.

   Esaki ta e di dos brote detecta riba un crusero di e compania.  Diasabra cu a pasa, e barco Symphony of the Seas a yega waf bek cu 48 pasahero cu a sali positivo pa Covid-19.

   Te cu Diahuebs atardi, no a cancela ningun viahe crusero di Royal Caribbean debi na e situacion aki, pero si nan ta keda mantene tur cos bao observacion.

   “Mundo ta sigui nabegando door di e pandemia di Covid-19 den evolucion constante, y nos ta sigui adapta nos protocolnan pa proteha nos huespednan, nos tripulacion, y lugarnan cu nos ta bishita,” nan a declara.

   Diahuebs atardi 5:00 pm, DIARIO a nota cu e barco Odyssey of the Seas ta bayendo pa pasa riba e lama net mey-mey di Haiti y Cuba, riba su ruta pa bay nabega mas cerca di estado di Florida, pa asina riba Diadomingo e por drenta bek na waf di Fort Lauderdale.